Тошкент вилоятида россиялик овчи «Ўзбекистон Қизил китоби»ига киритилган Тяншан қўнғир айиғини Экология қўмитаси раҳбари рухсати билан отиб ўлдиргани маҳаллий жамоатчиликнинг кенг муҳокамаларига сабаб бўлган эди. Унда яна битта Тяншан қўнғир айиғини отишга рухсатнома бор эди. Экология ва атроф-муҳитни муҳофаза қилиш давлат қўмитаси вакили жамоатчилик эътирози инобатга олиниб, овчига иккинчи айиқни отишга рухсат берилмаслигини маълум қилди.
Фото: Telegram / @ekologuz
Экология ва атроф-муҳитни муҳофаза қилиш давлат қўмитаси Биохилма-хиллик ва муҳофаза қилинадиган табиий ҳудудлар масалалари бўйича бош бошқарма бошлиғи Абдурашид Содиқовнинг сўзларига кўра, россиялик овчи Е.П.Широковга қўмита томонидан ов қилиш учун рухсатнома 2021 йилнинг 3 мартдан 31 декабрь кунигача берилган. 2021 йил «Қизил китоб»га киритилган қўнғир айиқни овлаш учун ажратилган квотадаги 2 та айиққа ариза Россия фуқароси Е.П.Широковдан келиб тушганлиги учун ҳам рухсатнома унга берилган.
«Квотадаги иккинчи айиқ ўрнатилган тартибда, яъни қонун устуворлигидан келиб чиққан ҳолда кўрилиб, бўлиб ўтган жамоатчилик эътирози инобатга олиниб, иккинчи айиқни отишга рухсат берилмайди», — деб таъкидлаган у.
Эслатиб ўтамиз, овчи Тяншан қўнғир айиғини ов қилиш учун тегишли тартибда пул тўлаган. «Ов қилиш ва овчилик хўжалиги тўғрисида»ги қонунга кўра, унинг миқдори хорижлик фуқароларга 3 минг АҚШ доллари миқдорида белгиланган.
