Исроил Ғазода Associated Press ва Al-Jazeera идоралари жойлашган бинони вайрон қилди. Ҳарбийлар бино эгасини зарбадан бир соат олдин огоҳлантирган (видео)

Ғазо секторида Исроил самолётлари берган зарбалар оқибатида Associated Press ва Al-Jazeera нашрларининг идоралари жойлашган кўп қаватли бино вайрон бўлди, деб ёзади Meduza.

Зарба беришдан бир соатча аввал Исроил ҳарбийлари бино эгасига қўнғироқ қилиб, иншоот ҳужум нишонига айланиши ва у ердан одамларни эвакуация қилиш кераклиги ҳақида огоҳлантирган. Шундан кейин огоҳлантириш сифатида бино томига кичик қувватли снаряд ташланган. Бино хўжайини ҳарбийларга мурожаат қилиб, журналистлар бинодан зарур материалларни олиб кетиши учун қўшимча 10 дақиқа беришни сўраган, аммо уни рад этишган.

ОАВлар идораларидан ташқари, бинода тижорат компаниялари офислари ва апартаментлар ҳам жойлашган эди.

Исроил Мудофаа армиясининг таъкидлашича, сўнгги бир неча кун ичида вайрон қилинган шу ва бошқа кўп қаватли бинолар ҲАМАС томонидан жанговар мақсадларда фойдаланилади, аммо тафсилотлар келтирилмади. Исроилнинг Channel 12 телеканали маълумотларига кўра, бинода, офислар билан бир қаторда, жангарилар томонидан фойдаланиладиган қурол-яроғ омборлари, кибермарказлар ва алоқа тугунлари ҳам бўлган бўлиши мумкин.

Associated Press агентлиги Исроил журналистлар ўтирган бинони ўз нишони сифатида танлаганидан «ҳайратга ва даҳшатга тушгани» ҳақида ёзди. «Бугун юз берган воқеа оқибатида энди дунё Ғазода содир бўлаётган ҳодисалар ҳақида камроқ нарса билади», — дейилади агентлик баёнотида.

Ҳужум оқибатида жабрланганлар ҳақида хабар берилмади.

Ушбу воқеа юзасидан БМТ бош котиби Антониу Гутерриш хавотир билдирди. «Бош котиб барча томонларга шуни эслатадики, фуқаро шахслар ва ОАВ тузилмаларига нисбатан ҳар қандай бетартиб (аниқ бир ҳарбий нишонга қаратилмаган) зарбалар халқаро ҳуқуққа зид бўлиб, ҳар қандай йўл билан уларнинг олди олиниши керак», — деди бош котибнинг расмий вакили Стефан Дюжаррик.

Исроил ҳамда ҲАМАС ўртасидаги низо 10 майда Исроил ҳукуматининг Қуддусдаги араб оилаларини кўчириш бўйича қарор қабул қилганидан кейин оммавий намойишлар бошланганидан сўнг кескинлашган.

10 майдан ҲАМАС Исроил ҳудудига ракета зарбаларини беришни бошлаган. Исроил мудофаа армияси мазкур ҳаракатларга жавобан Ғазо секторини бомбардимон қилди. Шунингдек, Исроил армияси ҲАМАС разведкасининг икки нафар юқори лавозимдаги вакили йўқ қилинганини, жангарилар ҳаракатланадиган иккита туннел тармоқларига, ташкилотнинг офисига зарба берилганини хабар қилди.

14 майда Машал Исроил билан тинчлик сулҳи тузишга тайёр эканлигини билдирган.