АҚШда бензин танқислиги юзага келгани боис кўпчилик ҳайдовчилар ёнилғи ғамлашга киришиб кетди. Флорида штатида Hummer’нинг йўлтанламаси юкхонасига қарийб 80 литр бензин юклаган ҳайдовчи ҳам шундай йўл тутган. Бироқ у уйига қадар етиб бора олмаган: ёнилғи қуйиш шохобчасидан чиққанидан кўп ўтмай, автомобиль ёниб кетган, деб хабар беради Motor.
Ўт ўчирувчилар 12 май куни келиб тушган чақириқ бўйича манзилга етиб борган. Улар ёнаётган Hummer’ни ўчиришга 20 дақиқа вақт сарфлаган ва оқибатида автомобиль тўлиқ ёниб кетган. Ёнғинга айнан нима сабаб бўлганини аниқлашнинг имкони бўлмаган.
Carscoops нашри томонидан эълон қилинган суратларда йўлтанламас кузови ва юкхонадаги эриган пластик канистрларни кўриш мумкин. Бироз куйиш жароҳатини олган ҳайдовчининг маълум қилишича, у Hummer’ига тўртта 19 литрли идишларни юклаган — машина жами 76 литр ёнилғи олиб кетаётган бўлган.
Эслатиб ўтамиз, АҚШдаги энг йирик ёнилғи қувурлари оператори бўлган Colonial Pipeline компанияси хакерлик ҳужумига учради. АҚШ расмийлари ёқилғи танқислиги хавфи туфайли минтақада фавқулодда ҳолат эълон қилди. Мамлакатдаги ёнилғи қуйиш шохобчаларида узун навбатлар пайдо бўлиб, асабийлашган ҳайдовчилар ўртасида эса бензин учун вақти-вақти билан ўзаро низолар келиб чиқа бошлади.
Шундан кейин компания хакерларга 5 млн доллар тўлаб, киберҳужумдан сўнг қувур линияси фаолияти қайта тиклангани ҳақида хабар берилди. Bloomberg ва The New York Times газеталарининг ёзишича, компания қувур тизимини қайта тиклаш учун пул талаб қилган киберҳужумчиларга тахминан 75 биткоин ёки 5 миллион доллар тўлаган.
Colonial Pipeline қувур линиясининг узунлиги 8800 километрдан ошади. АҚШ Шарқий соҳилига етказиладиган бензин, дизель ёқилғиси ва бошқа нефть маҳсулотларининг 45 фоизи шу қувур орқали ўтади. Компанияга уюштирилган киберҳужум АҚШнинг бир қатор штатларида бензинга талаб ортишига сабаб бўлди.
Изоҳ (0)