Туркия ҳукумати коронавирус туфайли мамлакатда ўрнатилган чекловларни босқичма-босқич бекор қилишни режалаштирмоқда. Бу ҳақда мамлакат президенти Ражаб Тоййиб Эрдўғон айтиб ўтди, деб ёзади «РБК».
«Ваъда қилинганидек, 17 майдан биз нормал ҳаётга қайтиш жараёнини бошлаймиз. Бизнинг мақсадимиз — май ойининг охиригача нисбатан эҳтиёткорлик билан ҳаракатда давом этиш», — деди Эрдўғон.
Унинг қўшимча қилишича, июнь ойига келиб Туркия ўз фуқароларининг ҳаётини янада енгиллаштириш учун чеклов чораларини «сезиларли даражада юмшатмоқчи».
Апрель ойи ўрталарида Туркия ҳукумати COVID-19’га чалиниш ҳолатининг ортиши муносабати билан чеклов чораларини кучайтирди. Мамлакатда комендантлик соати давомийлиги соат 19:00 дан 05:00 гача узайтирилди, ресторан ва кафеларга фақат етказиб бериш ва олиб кетиш режимида ишлашга рухсат берилди, спорт заллари ёпилди, ёпиқ биноларда тадбир ўтказиш тақиқланди.
Май ойида Туркияда янги чора-тадбирлар кучга кирди, унга кўра, дўконларда фақат асосий озиқ-овқат ва гигиена маҳсулотларини сотишга рухсат берилди. Шу тарзда илгари спиртли ичимликлар савдосига қўйилган тақиқ эндиликда электроника, ўйинчоқлар, офис буюмлари, кийим-кечак, автоулов аксессуарлари, дастурхон ва томорқа буюмлари учун ҳам амал қила бошлади.
Жаҳон соғлиқни сақлаш ташкилоти (ЖССТ) маълумотларига кўра, пандемия бошидан бери Туркияда 5 миллион кишида коронавирус қайд этилган, 43,8 минг киши касалликдан вафот этган. Мамлакат Соғлиқни сақлаш вазирлигининг хабар беришича, 13 май куни 11,5 минг кишига COVID-19 ташхиси қўйилган, 238 киши вафот этган.
Изоҳ (0)