Россия президенти Владимир Путин Мустақил Давлатлар Ҳамдўстлиги (МДҲ) мамлакатларида рус тилини ривожлантириш бўйича таклифлар тайёрлашни буюрди, деб ёзади «ТАСС».
Путиннинг сўзларига кўра, МДҲ мамлакатларида рус тилини ўрганишни қўллаб-қувватлаш етарли даражада йўлга қўйилмаган, бу соҳада қўшимча чоралар кўриш керак.
«Яқин хориждан келадиган ёшлар, иқтидорли ёшлар учун олийгоҳларимизда таҳсил олиш имкониятини яратиш МДҲдаги ҳамкорларимиз билан биргаликда амалга оширадиган ишимизнинг муҳим таркибий қисмидир. Аммо бу борада, биз ушбу мамлакатларда рус тилини ўрганишни қўллаб-қувватлаб, мазкур тилни ривожлантиришга муносиб эътибор қаратишимиз керак», — деди Россия президенти ҳукумат йиғилишида.
Путин бу борада «бугунги кунда амалга оширилаётган ишлар етарли эмас»лиги сабабли таълим вазири Сергей Кравсовга қўшимча таклифлар киритишни буюрди. «Бугунги ишлардан кўра кўпроқ ҳаракат қилиш мумкин ва шундай қилиш керак ҳам», — деди Путин.
Путиннинг сўзларига кўра, у рус тилини ўрганишни қўллаб-қувватлаш масаласини қўшни мамлакатлардаги ҳамкасблари, жумладан 8-9 май кунлари Россияга ишчи ташриф билан келган Тожикистон президенти Эмомали Раҳмон билан муҳокама қилган. Шунингдек, Путин Сергей Кравсовдан Тожикистондаги ишлар бўйича ҳам тегишли таклифлар беришини сўради.
Путиннинг сўзларига кўра, ушбу йўналишда фақат минтақа ҳукуматининг саъй-ҳаракатлари камлик қилади. «Бизнинг кўмагимизсиз бу йўналишдаги муаммоларни самарали ҳал қилишнинг иложи йўқ. Уларнинг ҳал қилиниши бизнинг манфаатларимизга тўла мос келади, шунинг учун бу борада фаол иш олиб боришимиз керак», — деди Путин.
Эслатиб ўтамиз, март ойида тан олинмаган Тоғли Қорабоғ Республикаси рус тилини расмий давлат тили деб тан олди. Тоғли Қорабоғнинг давлат тили арман тили ҳисобланади. Рус тилига эса расмий мақом берилди.
Шунингдек, Қирғизистонда рус тилининг расмий тил мақоми сақлаб қолинадиган бўлди. Қирғизистон президенти Садир Жапаров мамлакатда расмий тиллардан бири, шунингдек, миллатлараро мулоқот тили бўлган рус тилининг мақомини ўзгартиришга қаратилган ҳар қандай уринишларга қарши чиқишини маълум қилган.
Изоҳ (0)