Rossiyaning Vladivostokdan Peterburggacha bo‘lgan bir qator shaharlarida 31-yanvar, yakshanba kuni muxolifatchi Aleksey Navalniy tarafdorlarining norozilik aksiyalari bo‘lib o‘tmoqda. “OVD-Info”ning so‘nggi ma’lumotlariga ko‘ra, hukumat tomonidan ruxsat berilmagan namoyishlarda 650 kishi qo‘lga olingan.

Vladivostok.

Foto: “TASS”

Bunday mitinglar o‘tgan yakshanba kuni — 23-yanvarda ham Rossiyaning o‘nlab shaharlarida, shuningdek, chet elda — Avstraliya, Germaniya, Avstriya, Chexiya, Buyuk Britaniya, AQSh, Chernogoriya va boshqa mamlakatlarda ham bo‘lib o‘tgan edi. Aksiyalarda o‘n minglab odamlar qatnashdi, uch mingdan ziyod odam qo‘lga olindi.

Novosibirsk.

Foto: “RIA Novosti”

Keyinroq Navalniyning tarafdorlari 31-yanvar kuni Rossiyaning 53 ta shahrida mitinglar o‘tkazish niyatini ma’lum qildi.

Sankt-Peterburg.

Foto: “RBK”

Aleksey Navalniy 2020-yil avgustdan beri Germaniyada edi. U Tomsk—Moskva samolyotida o‘zini yomon his qilgani sababli davolanish uchun olib ketilgan. Tahlillar natijasiga ko‘ra, Navalniy “Novichok” guruhidagi modda bilan zaharlangani ma’lum bo‘ldi. Dekabr oyida Bellingcat va The Insider siyosatchini Federal xavfsizlik xizmatining sakkiz nafar xodimidan iborat maxsus guruh zaharlagani ta’kidlangan tekshiruv natijalarini e’lon qildi.

Krasnoyarsk.

Foto: “TASS”

14-yanvar kuni Jazolarni ijro etish federal xizmati siyosatchi 29-dekabr kuni departament tashabbusi bilan qidiruvga berilganini xabar qildi. U “Iv Roshe” ishi bo‘yicha rejimni buzgan, unga muvofiq Navalniy oyda ikki marta Jazolarni ijro etish federal xizmati organlariga borib, ro‘yxatdan o‘tishi kerak bo‘lgan. Davolanishdan keyingi reabilitatsiya ro‘yxatga olishga kelmaslik uchun asos bo‘lolmasligi ma’lum qilindi.

Yakutsk.

Foto: “TASS”

Navalniy 17-yanvar kuni kechqurun Berlindan Moskvaga qaytib keldi. Sheremetyevo aeroportida siyosatchi “Iv Roshe” ishi doirasida hibsga olindi va Ximki shahridagi politsiya bo‘limiga olib ketildi. Ximki shahar sudi Aleksey Navalniyni 15-fevralga qadar qamoqqa olish bo‘yicha hukm chiqardi.

Yekaterinburg.

Foto: “TASS”

28-yanvar kuni esa Moskva viloyat sudi Aleksey Navalniyning advokatlari tomonidan siyosatchining Moskvadagi “Matrosskaya Tishina” nomli tergov izolyatoridan ozod qilinishini talab qilgan apellyatsiya shikoyatini rad etdi. Uchrashuv davomida Navalniy tergov izolyatoridan videoaloqa orqali nutq so‘zladi.

Ulan-Ude.

Foto: Instagram / konoplyov_

Kemerovo.

Foto: “TASS”