Shavkat Mirziyoyev: “Go‘sht va yog‘ning jahon bozoridagi narxlari to‘xtovsiz o‘sayotgani barcha rahbarlarni chora-tadbirlar ko‘rishga undashi kerak”

Prezident Shavkat Mirziyoyev raisligida 12-may, chorshanba kuni o‘tkazilgan yig‘ilishda davlat rahbari oziq-ovqat mahsulotlari ishlab chiqarish hajmi va narx-navosi haqida so‘z yuritdi, deya xabar bermoqda “Daryo” muxbiri.

“Aholini oziq-ovqat bilan ta’minlash kun sayin dolzarb masalaga aylanib bormoqda. Lekin ayrim hududlarda ba’zi turdagi oziq-ovqat mahsulotlari ishlab chiqarish hajmlari kamayishiga yo‘l qo‘yilmoqda.

Misol uchun, tuxum ishlab chiqarish hajmi Toshkent viloyatida 5 foizga, Sirdaryoda 4 foizga kamayishi hisobiga ushbu viloyatlarda tuxumning narxi 7 foizga, respublika bo‘yicha esa 3,6 foizga oshgan.

Go‘sht va o‘simlik yog‘ining ham jahon bozoridagi narxlari 1 yildan buyon to‘xtovsiz o‘sayotgani barcha rahbarlarni zarur chora-tadbirlarni ko‘rishga undashi kerak”, — dedi davlat rahbari.

Prezident yog‘-moy mahsulotlariga ichki bozorda aholi talabini qondirish maqsadida joriy yilda 246 ming tonna moyli ekinlarni yetishtirish kerakligini ta’kidladi.

“G‘aniyev, Norqobilov viloyat hokimlari bilan birga joriy yilda chorvachilik yo‘nalishida 1 mingta, parrandachilikdagi 277 ta loyihani ishga tushirish hisobiga 13 ming tonna go‘sht, 608 ming tonna sut, 3 milliard dona tuxum va 14 ming tonna parranda go‘shti yetishtirilishini ta’minlashi lozim.

G‘aniyev, J.Xodjayev, Xaitov viloyat hokimlari bilan birga 1,1 million gektar asosiy maydonlarda 224 ming gektar bog‘-tok oralariga hamda g‘alla va ertaki ekinlardan bo‘shaydigan 873 ming gektarga sabzavot, kartoshka, poliz, sholi, moyli va ozuqa ekinlarini yetishtirishni tashkil etishlari zarur.

Yog‘-moy mahsulotlariga ichki bozorda aholi talabini qondirish maqsadida joriy yilda 246 ming tonna moyli ekinlarni yetishtirish va buning hisobiga 86 ming tonna moy ishlab chiqarilishini ta’minlash kerak”, — dedi Shavkat Mirziyoyev.