Арманистон парламенти 10 май куни бўлиб ўтган махсус йиғилишда Вазирлар Маҳкамаси раҳбари вазифасини бажарувчи Никол Пашинянни иккинчи марта ҳам республика бош вазири этиб сайламади, натижада парламент тарқатиб юборилди. Бу ҳақда «Спутник Армения» нашрига таяниб, «РБК» хабар берди.
Парламент аъзоларидан бири Пашинян номзодини ёқлаб, яна бири унга қарши овоз берди, 76 киши овоз беришда бетараф қолди.
Пашинян ўз нутқида ушбу махсус йиғилишнинг мақсади бош вазирни сайлаш эмас, балки муддатидан олдин парламент сайловларини ўтказиш учун зарур тартиб-қоидаларга риоя қилиш эканини таъкидлади.
Арманистон Конституциясининг 149-моддасига мувофиқ, агар парламент кетма-кет икки марта бош вазирни сайламаса, парламент қонун билан тарқатиб юборилади.
Бундан аввал, 3 май куни ҳам Арманистон парламенти бош вазир вазифасини бажарувчи Никол Пашинянни ҳукумат раҳбари этиб сайлашдан бош тортган эди.
Парламент тарқатиб юборилгандан кейин мамлакат президенти расман навбатдан ташқари парламент сайловларида овоз бериш санасини белгилайди.
Сайлов 20 июнь куни бўлиб ўтиши кутилмоқда.
Аввалроқ Никол Пашинян Facebook орқали халққа мурожаат қилиб, истеъфо берганини эълон қилди. Пашиняннинг аниқлик киритишича, 20 июнда бўлиб ўтадиган парламентга навбатдан ташқари сайловларгача у ҳукумат раҳбари вазифасини вақтинчалик бажарувчи бўлиб туради.
Изоҳ (0)