Armaniston parlamenti 10-may kuni bo‘lib o‘tgan maxsus yig‘ilishda Vazirlar Mahkamasi rahbari vazifasini bajaruvchi Nikol Pashinyanni ikkinchi marta ham respublika bosh vaziri etib saylamadi, natijada parlament tarqatib yuborildi. Bu haqda “Sputnik Armeniya” nashriga tayanib, “RBK” xabar berdi.
Parlament a’zolaridan biri Pashinyan nomzodini yoqlab, yana biri unga qarshi ovoz berdi, 76 kishi ovoz berishda betaraf qoldi.
Pashinyan o‘z nutqida ushbu maxsus yig‘ilishning maqsadi bosh vazirni saylash emas, balki muddatidan oldin parlament saylovlarini o‘tkazish uchun zarur tartib-qoidalarga rioya qilish ekanini ta’kidladi.
Armaniston Konstitutsiyasining 149-moddasiga muvofiq, agar parlament ketma-ket ikki marta bosh vazirni saylamasa, parlament qonun bilan tarqatib yuboriladi.
Bundan avval, 3-may kuni ham Armaniston parlamenti bosh vazir vazifasini bajaruvchi Nikol Pashinyanni hukumat rahbari etib saylashdan bosh tortgan edi.
Parlament tarqatib yuborilgandan keyin mamlakat prezidenti rasman navbatdan tashqari parlament saylovlarida ovoz berish sanasini belgilaydi.
Saylov 20-iyun kuni bo‘lib o‘tishi kutilmoqda.
Avvalroq Nikol Pashinyan Facebook orqali xalqqa murojaat qilib, iste’fo berganini e’lon qildi. Pashinyanning aniqlik kiritishicha, 20-iyunda bo‘lib o‘tadigan parlamentga navbatdan tashqari saylovlargacha u hukumat rahbari vazifasini vaqtinchalik bajaruvchi bo‘lib turadi.
Izoh (0)