Ўзбекистон аҳолиси 2021 йилнинг январь–апрель ойларида нақд пул ечиб олиш ва хорижий валюта сотиб олишни оширди. Бу ҳақда Марказий банк нақд пул муомаласи бўйича қисқача шарҳида маълум қилди.
Қайд этилишича, 2021 йил январь–апрель ойларида банклар орқали нақд пул айланмаси ҳажми 149,3 триллион сўмни ташкил этган. Бу 2020 йилнинг мос даврига нисбатан 41,6 фоизга кўп. Жумладан, банклар кассаларига нақд пул тушумлари 75,4 триллион сўмни, чиқим қилинган нақд пуллар эса 73,9 триллион сўмни ташкил этган.
Январь–апрель ойларида банк кассаларидан, шу жумладан, банкоматлардан берилган нақд пуллар 2020 йил январь–апрель ойларига нисбатан 38,5 фоизга ошди. Бундай ҳолат банк карталаридан нақд пул ечиш ҳажмининг 10,9 триллион сўмга (1,7 баробар) ҳамда нақд чет эл валютасини сотиб олиш учун йўналтириладиган нақд пуллар ҳажми 6,5 триллион сўмга (1,5 баробар) ўсиши ҳисобига юзага келди.
2021 йил январь–апрель ойларида банк карталарига 78,4 триллион сўмлик маблағлар келиб тушган бўлса, ушбу даврда банк карталаридаги 25,9 триллион сўмлик (33,1 фоиз) маблағлар аҳоли томонидан нақдлаштириб олинган.
Эслатиб ўтамиз, 2020 йилда Ўзбекистондаги банклар орқали нақд пул айланмаси ҳажми 60,1 триллион сўмни ташкил этиб, бу кўрсаткич 2019 йилга нисбатан 25,4 фоизга ошган эди. Жисмоний шахслар томонидан валюта айирбошлаш шохобчалари орқали 2020 йилда сотилган чет эл валютаси миқдори 4,6 миллиард долларни ташкил этган. Бу 2019 йилдаги кўрсаткичга (3,8 миллиард) қараганда 21 фоизга кўп.
Изоҳ (0)