Қашқадарё вилоятида 2021 йилнинг ўтган 4 ойи давомида пиёдалар иштирокида содир бўлган ЙТҲлар оқибатида 23 нафар фуқаро вафот этган. Бу ҳақда «Дарё»га хабар берган вилоят Йўл ҳаракати хавфсизлиги бошқармаси ахборот хизмати раҳбари Жавлон Бахтиевнинг айтишича, вилоятда пиёдалар билан боғлиқ ЙТҲларнинг олдини олиш мақсадида «Пиёда ойлиги» тадбири ўтказилмоқда.
Таъкидланишича, «Пиёда ойлиги» тадбири 2021 йилнинг 1 майидан 30 май кунига қадар давом этади.
«Жорий йилнинг ўтган тўрт ойи давомида вилоятда пиёдалар билан боғлиқ 57 та йўл транспорт ҳодисаси содир бўлган бўлиб, шундан 37 та ҳолатда пиёда майиб-мажруҳ бўлиб қолган. 23 та ҳолатда эса ЙТҲ одам ўлими билан якунланган», — дейди Жавлон Бахтиев.
Жавлон Бахтиевнинг қўшимча қилишича, вилоятда 2021 йилнинг ўтган тўрт ойи давомида велосипед ҳайдовчилари иштирокида 10 та ЙТҲ содир этилган бўлиб, 7 та ҳолатда велосипед ҳайдовчиси тан жароҳати олган, 3 та ҳолатда эса ЙТҲ велосипед ҳайдовчисининг ўлими билан якунланган.
«Ички ишлар вазирлиги, Йўл ҳаракати хавфсизлиги бош бошқармаси бошлиғи фармойишига асосан жорий қилинган ‘Пиёда ойлигиъда вилоятимиздаги мавжуд ўқув муассасаларида бўлиб, тарғибот тадбирларини олиб боряпмиз. Мақсадимиз пиёдаларнинг ҳушёрлигини орттириб, улар иштирокида содир бўлиши мумкин бўлган кўнгилсиз воқеаларнинг олдини олишдан иборат», — дейди Жавлон Бахтиев.
Аввалроқ Ўзбекистонда январь—март ойларида содир бўлган ЙТҲларда қарийб 400 киши ҳалок бўлгани хабар берилганди.
Изоҳ (0)