Ўзбекистон Президенти Шавкат Мирзиёев 6 май куни «Самарқанд вилоятида эксперимент тариқасида маҳаллабай ишлаш тизимини жорий этишга қаратилган чора-тадбирлар тўғрисида»ги қарорни имзолади, деб хабар беради ЎзА.
Ҳужжат «тадбиркорлик интилишларини молиявий қўллаб-қувватлаш, уларнинг даромадли меҳнат билан бандлигини таъминлаш механизмларини янги босқичга олиб чиқиш, ёшлар ва хотин-қизларнинг тадбиркорлик ташаббусларини амалга оширишга кўмаклашишга» қаратилган.
Туман (шаҳар) ҳокимлиги таъсисчилигида Маҳаллабай ишлаш марказлари давлат муассасаси шаклида ташкил этилади. Бу каби марказлар Пастдарғом, Ургут ва Булунғур туманларида 2021 йил 1 июндан бошлаб ҳамда Самарқанд вилоятининг қолган туман (шаҳар)ларида 1 августга қадар ташкил этилади.
Қарорга кўра, Маҳаллабай ишлаш марказларининг фаолияти туман (шаҳар) ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари томонидан мувофиқлаштириб борилади. Марказларда очиладиган штат бирликлари туман (шаҳар) бандликка кўмаклашиш марказининг ишга жойлаштириш инспекторлари штат бирликлари қисқартирилиши ҳисобидан шакллантирилади.
Марказнинг асосий вазифалари қаторидан аҳолининг бандлигини таъминлаш ва доимий даромад манбаини яратиш орқали камбағалликни қисқартириш чораларини кўриш, маҳаллабай ишлаш асосида тадбиркорликни ривожлантиришга кўмаклашиш ҳамда аҳолини касб-ҳунар ва тадбиркорликка ўқитиш, тадбиркорлик қилиш истагида бўлган фуқароларга, жумладан, аёллар ва ёшларга кредит ҳамда субсидиялар олишда кўмаклашиш ўрин олган.
2022 йил 1 январдан бошлаб мазкур экспериментни республиканинг бошқа ҳудудларида жорий қилиш бўйича таклифлар тайёрланади.
Эслатиб ўтамиз, апрель ўрталарида Президент Шавкат Мирзиёев Ўзбекистонда Маҳаллабай ишлаш маркази ташкил этилишини маълум қилганди.
Изоҳ (0)