Турк актёри Ҳалит Эргенчнинг ҳаёти «Муҳташам юз йил»дан кейин қанчалик ўзгарди?

«Муҳташам юз йил» сериалида султон Сулаймонни гавдалантирганидан кейин нафақат Туркия, балки бутун дунёда машҳурликка эришган турк актёри Ҳалит Эргенчнинг шахсий ҳаёти ва карьераси билан боғлиқ маълумотларни эътиборингизга ҳавола этамиз.

Денгизчи, хонанда, актёр

Ҳалит таниқли актёр, хонанда ва композитор Саит Эргенчнинг оиласида дунёга келган. Болалигидан ижодкорона муҳитда катта бўлган актёр мусиқа ва рақсга қизиққан. Истанбул техника университетининг денгиз факультетига ўқишга кирган, аммо мазкур муассасада таҳсил олиш унга қимматга тушишини билгач, ҳужжатларини олиб консерваторияга топширган. Айнан шу ерда у келажакда у ўзини театр ва кинода кўришни исташини тушуниб етган. Ўқиш билан бирга у оператор ва маркетолог сифатида ҳам фаолият олиб борган. Пул топиш мақсадида турли тадбирларда чиқиш қилган. Дипломни қўлга киритган вақтида ҳали режиссёрлар унга қизиқиб улгурмагани сабаб, театрда кичик роллар ижро қилиши ва рекламаларда суратга тушишига тўғри келган. Бора-бора унга омад кулиб боққан ва фильмларда суратга тушиш таклиф қилина бошланган. Унинг ижросидаги «Алия» сериали ва «Отам ва ўғлим» фильми машҳурликка эришган.

Туркия юлдузи

Актёр танилишга улгурганидан кейин АҚШга жўнаб кетган ва бир ярим йил давомида у ерда яшаб Бродвей театрида рол ўйнаган. Қайтганидан кейин эса режиссёрлар Америкада ҳам тажрибага эга бўлган актёрни ўз фильмларида кўришни истаб таклиф билдира бошлаган. «Биринчи севги», «Ўлимга қадар» ва «Бир минг бир кеча» лойиҳаларида иштирок этган. 2011 йилда эса унга «Муҳташам юз йил» сериалида бош рол ижро қилиш таклиф қилинган. Тарихий фактларга ўзгартиришлар киритилгани сабаб турли танқидлар бўлганига қарамай, лойиҳа Туркиядан ташқарида ҳам машҳурликка эришган.

«Сериалнинг биринчи мавсум экран юзини кўрганидан кейин бизга осон бўлмаган. ‘Муҳташам юз йил’ жуда ҳам кўп танқид қилинган. Кўпчиликка биз талқин қилган Сулаймон образи ёқмаган. Аммо менинг фикримча, ҳамма яхши сурат чизолган одам Сулаймоннинг суратини ўзича чизса, рассомлар сони қанча кўп бўлса, унинг портретлари ҳам шунча бўларди. Мазкур фикр мени танқидларга эътибор бермаслигимга ёрдам берди. Кейинроқ эса Сулаймоннинг севгига тўла, бағри кенг экани сабаб мени қаҳрамонимни яхши кўра бошладилар», — деган актёр.

https://www.instagram.com/p/4bVn1GhGbt/

Ушбу сериалнинг суратга олиш ишлари якунланганидан кейин Ҳалит бироз муддат дам олишни истаб, баъзи режиссёрларнинг таклифини рад қилган. Танаффусдан кейин эса «Ватаним сенсан» сериалида суратга тушган. Маълумотларга қараганда, Эргенч ҳақиқий юлдуз сифатида сериалнинг яратилиш жараённинг барча босқичини назорат қилган ва асосий аёл қаҳрамон ролини рафиқаси гавдалантиришини истаган. Аммо лойиҳа «Муҳташам юз йил»чалик омадли чиқмаган.

https://www.instagram.com/p/4Ehb6eBGW3/

Актёр суратга тушиш билан бирга хонандаликни ҳам унутмайди, концерт беради ва турли тадбирларда чиқиш қилади. У қилаётган ишини яхши кўрадиган одамлар борлиги муҳимлиги, ўзи мусиқа билан шуғулланганида ҳузур-ҳаловатни ҳис қилишини таъкидлайди.

Ажрашиш ва янги ҳаёт

Ҳалит 2007 йилда Гизем Сойсалди билан турмуш қурган, аммо уларнинг турмуши 1 йил, яъни у суратга олиш жараёнида Бергузар билан танишгунига қадар давом этган. «Бир минг бир кеча» сериалида танишган жуфтлик бир-бирига кўнгил қўйган. Шундан кейин актёр Гизем билан ажрашишга қарор қилган. Кўпчилик актёрга лой чаплаган, Бергузар эса гулдек оилани ажрашиб кетишга сабабчи бўлишда айбланган.

«Орадан шунча вақт ўтишига қарамай, одамлар ҳали ҳам бизнинг турмушимизни муҳокама қилади. Нима учун улар бизни унута олмайди? Бергузарнинг биринчи турмушим бузилишига алоқаси йўқлигини яна бир марта такрорлашга мажбурман. Бергузар мен беҳад яхши кўрадиган ва ҳурмат қиладиган рафиқам. Муносабатларимиз бошланганида биз қийинчиликларга тайёр эдик. Рафиқамга нисбатан айбловларингиз ҳеч нимани ўзгартирмайди. Шу боис ҳурмат кўрсатишингиз ва турмуш ўртоғимни ҳақорат қилмаслигингизни талаб қиламан», — деган Эргенч.

Бундан ташқари, «Муҳташам юз йил»нинг суратга олиш вақтида кўпчилик у ва Марям ўртасида ишқий муносабатлар бор деб ҳисоблаган. Актёрлар улар шунчаки ролини профессионал ижро қилаётганини бир неча марта тушунтиришига тўғри келган.

Бу каби миш-мишлар кўп эканига қарамай, жуфтлик 10 йилдан ортиқ вақт давомида бахтли ҳаёт кечириб келмоқда. Улар илк бор 2010 йилда, 2020 йилда эса иккинчи марта фарзандли бўлган. Икки нафар ўғил — Али ва Хоннинг ота-онаси бўлган юлдузлар нафақат карьера балки, шахсий ҳаёт борасида ҳам муваффақиятга эришиб улгурган.