23—27 май кунлари Европа Иттифоқининг Марказий Осиё бўйича махсус вакили Питер Бурианнинг Ўзбекистонга ташрифи, май—июнда эса Тошкент ва Брюссель ўртасида бошқа алоқалар ўрнатилиши кутилмоқда. Бу ҳақда Ўзбекистон Ташқи ишлар вазирлигининг матбуот котиби Юсуф Қобулжоновга таяниб, «Gazeta.uz» хабар берди.
Бундан ташқари, Ўзбекистон ташқи ишлар вазири Абдулазиз Комиловнинг Ўзбекистон—Европа Иттифоқи ҳамкорлик кенгашидаги иштироки учун Брюсселга ташрифини ва Европа комиссияси, Европа ташқи алоқалар хизмати ҳамда Бельгия ТИВ раҳбарияти билан учрашувларини ташкиллаштириш ишлари олиб борилмоқда.
Шунингдек, томонлар сиёсат ва хавфсизлик масалалари бўйича юқори даражадаги «Европа Иттифоқи—Марказий Осиё» йиғилишни ўтказиш бўйича музокараларни олиб бормоқда. Ўзаро боғлиқлик ва барқарор ривожланиш бўйича Европа Иттифоқи—Марказий Осиё биринчи вазирлар учрашувига тайёргарлик ишлари давом этмоқда.
Ўзбекистон ва Европа Иттифоқи кенгайтирилган шериклик ва ҳамкорлик тўғрисидаги битим бўйича музокараларни жадаллаштириши тўғрисида 2020 йилнинг январида маълум қилинганди. Аввалроқ Питер Буриан Европа Иттифоқи Ўзбекистон билан янги кенгайтирилган шериклик ва ҳамкорлик тўғрисида икки томонлама битимга тайёргарлик ишлари якунланаётганини маълум қилганди. Битим 1999 йилдан бери ҳамкорлик ва шериклик борасида амалда бўлган келишув ўрнини эгаллайди.
Изоҳ (0)