Чегарадаги можародан сўнг Қирғизистоннинг Боткен вилояти раҳбари лавозимидан озод этилди

Қирғизистон бош вазири Улуғбек Марипов Боткен вилояти раҳбари Омурбек Суваналиевни лавозимидан озод қилди. Суваналиев лавозимга февраль ойида тайинланган эди, деб ёзади «Интерфакс».

«Бугун менга бош вазир томонидан имзоланган тегишли буйруқ асосида бошқа ишга ўтганим сабабли лавозимидан озод қилинганим тўғрисида хабар беришди», — деди Омурбек Суваналиэв 4 май куни «Интерфакс»га.

Суваналиев 1 февраль куни Қирғизистон ҳукуматининг Боткен вилоятидаги ваколатли вакили этиб тайинланган эди. 2019 йил февралдан 2020 йил октябргача у мамлакат Хавфсизлик Кенгаши котибининг ўринбосари бўлиб ишлаган.

Ҳукумат матбуот хизматининг хабар беришича, бош вазир, шунингдек, ўз маслаҳатчиси Арзибек Буркановни, Боткен вилояти раҳбари ўринбосари Эрлан Сапарбаевни ҳамда Боткен ва Лайлак туманлари ҳокимлари Баймурат Бекмуратов ва Оқилбек Ўрозовларни ҳам ишдан бўшатиш тўғрисидаги буйруқни имзолаган.

Қирғизистон Давлат чегара хизматининг собиқ раиси Абдикарим Алимбаевни Боткен вилояти раҳбари этиб тайинланди.

«Мажлисда ҳукуматнинг Боткен вилоятидаги янги ваколатли вакили этиб Абдикарим Алимбоев кўрсатилди», — дейилади вилоят маъмурияти хабарида. Бундан ташқари, Боткен ва Лайлак туманлари раҳбарларини тайинлаш кутилмоқда.

Аввалроқ Қирғизистон ва Тожикистон Бош прокуратуралари чегарадаги қуролли низодан кейин бир-бирларининг ҳарбийларига ва фуқароларига нисбатан жиноий иш очган эди. Қирғизистон прокуратураси Тожикистон билан низони «бостириб кириш» деб атади, Тожикистон прокуратураси эса Қирғизистоннинг ҳаракатларини «тажовузкорлик» деб баҳолади.

Қирғизистон ва Тожикистон чегарасидаги низо 28 апрель куни маҳаллий аҳоли ўртасидаги жанжал билан бошланган эди. У эса тожикистонлик ҳарбийлар баҳсли ҳудудда жойлашган «Головной» сув тақсимлаш пункти яқинидаги электр устунига видеокузатув камераларини ўрнатганидан кейин келиб чиққан. Қирғизистон чегара хизматининг ахбороти бўйича 29 апрелда икки давлат ҳарбийлари ўртасида отишма содир бўлган.

Шунингдек, Қирғизистон ва Тожикистон ўз қўшинларини давлат чегарасидан олиб чиқиб кетишни якунлагани, шунингдек, низо чоғида гаровга олинган ўн нафар Қирғизистон фуқароси Тожикистонда асирликдан озод этилгани хабар берилган эди.