Қозоғистон президенти Қосим-Жўмарт Тўқаев 19—20 май кунлари расмий ташриф билан Тожикистонга келади ҳамда мазкур мамлакат раҳбари Эмомали Раҳмон билан музокаралар олиб боради. Бу ҳақда Қозоғистон президентининг матбуот котиби Берик Уали маълум қилди, деб ёзади «ТАСС».
«Жорий йилнинг 19—20 май кунлари президент Қосим-Жўмарт Тўқаев Тожикистон президенти Эмомали Раҳмоннинг таклифига биноан расмий ташриф билан Тожикистон Республикасида бўлади. Ташриф давомида икки давлат раҳбарлари тор ва кенгайтирилган форматда учрашувлар ўтказиши режалаштирилган», — деб ёзди Уали ўзининг Facebook саҳифасида.
Унинг таъкидлашича, музокаралар кун тартибидан сиёсий мулоқотни янада мустаҳкамлаш, савдо-иқтисодий, сармоявий ва маданий-гуманитар алоқаларни ривожлантиришга эътибор қаратган ҳолда Қозоғистон—Тожикистон стратегик шериклигини ривожлантириш масалалари ўрин олган. «Минтақавий ҳамкорликни фаоллаштириш, Марказий Осиёда барқарорлик ва хавфсизликни таъминлашга алоҳида эътибор қаратилади», — деди матбуот котиби.
2019 йил июнь ойида Тўқаев Тожикистонда Осиёда ўзаро ҳамкорлик ва ишонч чоралари бўйича конференциянинг бешинчи саммитда бўлиб, ўшанда Раҳмон билан ҳам учрашув ўтказган эди. Ўз навбатида, Тожикистон раҳбари 2018 йил март ойида Қозоғистонда Нурсултон Назарбоев президентлиги даврида республикага ташриф буюрган.
Эслатиб ўтамиз, Шавкат Мирзиёев Тожикистон президенти Эмомали Раҳмоннинг таклифига биноан 10−12 июнь кунлари расмий ташриф билан Душанбеда бўлади.
Изоҳ (0)