Сўнгги икки йилдан буён Huawei компаниясининг смартфон ишлаб чиқариш борасидаги бизнеси таназзулга учрамоқда. Huawei Америка санкциялари ортидан жиддий зарар кўрганини инкор этмаяпти. Хитой гиганти раҳбарларидан бири компания шунчаки омон қолишга уринаётганини тан олган, деб хабар беради IXBT.
Хитойдаги маълумотларга кўра, Huawei смартфонлари, асосан, мамлакатнинг ўзида сотилмаяпти. Пекиндаги Huawei’нинг расмий дўконларидан бирининг ходими смартфонлар йўқлиги, мамлакатнинг бошқа дўконларида ҳам шу каби вазият кузатилаётганини маълум қилган.
Huawei’нинг Хитойдаги бир нечта дўконига амалга оширилган ташрифлардан сўнг, вазият тасдиқланган. Асосан бренднинг икки ёки уч модели сотилмоқда, айримларида эса фақат битта моделни учратиш мумкин.
Huawei’нинг истеъмол бизнеси бўйича бош директори Ю Чендоннинг айтишича, икки йилдан камроқ муддатда АҚШ Huawei’га қарши тўртта раундли санкцияларни жорий этган. Бу эса бизнесга жиддий зарар етказган. Унинг сўзларига кўра, «Huawei’нинг Хитойдаги юқори синфга кирувчи мобил телефон ва планшетлари улуши ҳозирда Apple’га тегишли». Ўрта ва қуйи сегмент учун Oppo, Vivo ва Xiaomi таклиф этилмоқда.
IDC маълумотларига кўра, биринчи чоракда 346 миллион дона смартфон сотилган. Бу ўтган йилгига нисбатан 25,5 фоизга кўп. Кўп йиллардан бери биринчи бор Huawei жаҳон бозоридаги етакчиларнинг топ-5 лигига кира олмади. Хитой бозорида савдолар ҳозирда қайта тикланмоқда. 2021 йилнинг биринчи чорагида 92,4 миллион дона смартфон етказиб берилган. Huawei ҳозирда учинчи поғонада, бироқ омбордаги захиралар тугаши билан савдолар тушиб кетиши кутилмоқда.
Эслатиб ўтамиз, 2020 йилнинг июль ойида АҚШ Huawei ва Хитойнинг бошқа технологик компаниялари учун виза чекловларини жорий қилган эди. Давлат департаментининг маълум қилишича, бу компаниялар инсон ҳуқуқларининг бузилишида иштирок этаётган мамлакатлар расмийларига ёрдам кўрсатмоқда. 2020 йилнинг ноябрь ўрталарида эса Huawei компанияси ўзининг Honor брендини 30 дан ортиқ компанияларни ўзида бирлаштирган Shenzhen Zhixin Nеw Information Technology Cо. консорциуми сотиб олганини расман эълон қилганди.
Изоҳ (0)