So‘nggi ikki yildan buyon Huawei kompaniyasining smartfon ishlab chiqarish borasidagi biznesi tanazzulga uchramoqda. Huawei Amerika sanksiyalari ortidan jiddiy zarar ko‘rganini inkor etmayapti. Xitoy giganti rahbarlaridan biri kompaniya shunchaki omon qolishga urinayotganini tan olgan, deb xabar beradi IXBT.
Xitoydagi ma’lumotlarga ko‘ra, Huawei smartfonlari, asosan, mamlakatning o‘zida sotilmayapti. Pekindagi Huawei’ning rasmiy do‘konlaridan birining xodimi smartfonlar yo‘qligi, mamlakatning boshqa do‘konlarida ham shu kabi vaziyat kuzatilayotganini ma’lum qilgan.
Huawei’ning Xitoydagi bir nechta do‘koniga amalga oshirilgan tashriflardan so‘ng, vaziyat tasdiqlangan. Asosan brendning ikki yoki uch modeli sotilmoqda, ayrimlarida esa faqat bitta modelni uchratish mumkin.
Huawei’ning iste’mol biznesi bo‘yicha bosh direktori Yu Chendonning aytishicha, ikki yildan kamroq muddatda AQSh Huawei’ga qarshi to‘rtta raundli sanksiyalarni joriy etgan. Bu esa biznesga jiddiy zarar yetkazgan. Uning so‘zlariga ko‘ra, “Huawei’ning Xitoydagi yuqori sinfga kiruvchi mobil telefon va planshetlari ulushi hozirda Apple’ga tegishli”. O‘rta va quyi segment uchun Oppo, Vivo va Xiaomi taklif etilmoqda.
IDC ma’lumotlariga ko‘ra, birinchi chorakda 346 million dona smartfon sotilgan. Bu o‘tgan yilgiga nisbatan 25,5 foizga ko‘p. Ko‘p yillardan beri birinchi bor Huawei jahon bozoridagi yetakchilarning top-5 ligiga kira olmadi. Xitoy bozorida savdolar hozirda qayta tiklanmoqda. 2021-yilning birinchi choragida 92,4 million dona smartfon yetkazib berilgan. Huawei hozirda uchinchi pog‘onada, biroq ombordagi zaxiralar tugashi bilan savdolar tushib ketishi kutilmoqda.
Eslatib o‘tamiz, 2020-yilning iyul oyida AQSh Huawei va Xitoyning boshqa texnologik kompaniyalari uchun viza cheklovlarini joriy qilgan edi. Davlat departamentining ma’lum qilishicha, bu kompaniyalar inson huquqlarining buzilishida ishtirok etayotgan mamlakatlar rasmiylariga yordam ko‘rsatmoqda. 2020-yilning noyabr o‘rtalarida esa Huawei kompaniyasi o‘zining Honor brendini 30 dan ortiq kompaniyalarni o‘zida birlashtirgan Shenzhen Zhixin New Information Technology Co. konsorsiumi sotib olganini rasman e’lon qilgandi.
Izoh (0)