Қибрайдаги янги боғ жойлашган ерлар Тошкент таркибига ўтказилади – Шавкат Мирзиёев

Ўзбекистон Президенти Шавкат Мирзиёев 1 май куни Тошкент вилоятининг Қибрай туманидаги янги истироҳат боғи қурилаётган жойга ташриф буюрди ва илк кўчатларни экишда иштирок этди. Давлат раҳбари ўз нутқида янги боғ жойлашган ерлар Тошкентга ўтказилишини айтди. Бу ҳақда «Gazeta.uz» хабар қилди.

«Ушбу боғ Тошкент вилояти ҳудудида жойлашган. Биз ушбу ерларни Тошкент шаҳрига ўтказамиз. Агар парламент буни маъқулласа, боғ Тошкент таркибига киради. Барибир Тошкент катта бўлиши керак. Аҳолимизда уй-жойга, ижтимоий соҳаларга талаб юқори бўляпти», – деди Президент.

Президентнинг таъкидлашича, уч-тўрт йил ичида Тошкентда қурилиш соҳасида жуда кўп ишлар амалга оширилди, янги бинолар ва иншоотлар қад ростлади.

«Энди буни тўхтатиб, (қурилиш ишларини) шаҳардан ташқарисига чиқарамиз», – деди Шавкат Мирзиёев.

Февраль ойида «Тошкент-Шарқий» аэродроми яқинида янги истироҳат боғи ва Олимпия шаҳарчаси қурилиши ҳақида хабар берилганди.

Бу ерда мамлакат мустақиллигининг 30 йиллигига бағишланган «Истиқлол» мажмуаси ҳам бунёд этилади. «Gazeta.uz»нинг Қурилиш вазирлигига таяниб хабар қилишича, бу мажмуа Тошкент шаҳридаги «Мовий гумбазлар» хиёбонида қурилиши керак бўлган айни мажмуанинг ўзи.

Шавкат Мирзиёев ушбу боғ «Ўзбекистоннинг янги қиёфасини, унинг улкан салоҳиятини, кўп миллатли халқининг бирлиги ва ҳамжиҳатлигини акс эттирувчи» мажмуа бўлиши кераклигини таъкидлади. Шуларни инобатга олган ҳолда у боғга «Янги Ўзбекистон» номини беришни таклиф қилди.

Маълумот учун, 5 август куни Шавкат Мирзиёев Тошкент шаҳри ва Тошкент вилоятининг ўзаро чегарадош бўлган туманлари ҳудудларини ўзгартириш бўйича тайёрланган лойиҳалар тақдимоти билан танишгани тўғрисида хабар берилганди. Таъкидланишича, аҳолига қулайлик яратиш мақсадида шаҳардан Тошкент вилоятига 1010 гектар, вилоятдан пойтахтга 10 196 гектар ер майдони ўтказилиши режалаштирилган.

Ишчи гуруҳ томонидан Сергели туманидан 1752 гектар, Бектемирдан 267 гектар, Зангиотадан қарийб 328, Қуйи Чирчиқдан салкам 129, Янгийўлдан 263, Ўрта Чирчиқдан 1346 гектар ажратиб, Янги ҳаёт туманини жами 4085 гектарда ташкил этиш бўйича таклиф ишлаб чиқилган.