Indoneziyaning Bali oroli qirg‘oqlari yaqinida 838 metr chuqurlikda, besh kun oldin g‘oyib bo‘lgan KRI Nanggala-402 suvosti kemasining qoldiqlari topildi. Bu haqda Indoneziya armiyasi va dengiz floti vakillariga tayanib, The Jakarta Post xabar berdi.

Foto: AP Photo

Indoneziya Qurolli kuchlari bosh qo‘mondoni, havo marshali Xadi Tchaxjantoning ma’lum qilishicha, kameralar bilan jihozlangan suv osti roboti okean tubida deyarli 60 metrlik suvosti kemasini topdi. U kamida uch qismga bo‘linib ketgan: kemaning korpusi, quyruq qismi va barcha asosiy elementlari ajralib ketgan. Asosiy qism parchalanib ketgan.

Foto: EPA

Foto: EPA

Foto: EPA

Foto: EPA

Qidiruv natijasida topilgan qutqaruv kiyimi

Foto: EPA

Qo‘mondon to‘plangan dalillar bilan suvosti kemasining cho‘kib ketgani hamda bortdagi barcha harbiy xizmatchilarning halok bo‘lgani haqidagi xulosani inkor etib bo‘lmasligini ta’kidladi. “Qutqaruvchilar, shuningdek, ekipajning 53 a’zosidan biri qochishga uringanidan darak beruvchi qutqaruv kiyimini topdi”, — deya qo‘shimcha qildi u.

Ta’kidlanishicha, fojia yuzasidan surishtiruv davom etmoqda, ammo rasmiylar hodisada inson omilini istisno qilmoqda, chunki kema suvga tushirilishidan oldin “ekipaj tomonidan barcha kerakli protseduralar amalga oshirilgan”. Indoneziya harbiylari kemani Bali dengizi tubidan olib chiqmoqchi, ammo ularda bunday tajriba yo‘q, deya tan oldi Tchaxjanto.

KRI Nanggala-402 suvosti kemasi 21-aprelda Bali oroli yaqinidagi torpedolarni chiqarish bo‘yicha harbiy o‘quv mashg‘ulotlari vaqtida yo‘qolgan. Kema bortida 53 nafar odam bo‘lgan. Keyinchalik AQSh Indoneziyaning g‘oyib bo‘lgan suvosti kemasini qidirish uchun aviatsiya yuborishi, bedarak yo‘qolgan suvosti kemasida kislorod tamom bo‘lgani haqida xabarlar berilgan. Sodir bo‘lgan voqeaning kelib chiqish sabablari yuzasidan rasmiy taxminlar bildirilmagan.

Keyinroq Indoneziya Harbiy dengiz kuchlari suvosti kemasidagi buyumlar topilgani, 53 nafar ekipaj a’zosining hammasi halok bo‘lganini ma’lum qildi. 24-aprel kuni Indoneziya Harbiy dengiz kuchlari shtabi boshlig‘i suvosti kemasining bo‘laklari, taxminan, 850 metr chuqurlikdan topilgani haqida xabar berdi. Kema 500 metrgacha chuqurlikka tushish uchun mo‘ljallangan edi. 25-aprel kuni Indoneziya prezidenti Joko Vidodo rasman KRI Nanggala-402 suvosti kemasini Bali dengizida halokatga uchragan deb e’lon qildi va ekipaj a’zolarining oilalariga hamdardlik bildirdi.

KRI Nanggala-402 1981-yilda Germaniyada qurilgan, 2011-yilda esa modernizatsiya qilingan edi. Bu Indoneziya Harbiy dengiz kuchlari arsenalidagi beshta shunday kemadan biridir.