Qashqadaryo hokimi Zoir Mirzayev Qarshi shahrida 1 milliard 350 million so‘mga qurib bitkazilishi mo‘ljal qilingan bayroq ustundan voz kechdi va bayroq uchun mo‘ljallangan mablag‘ni xaroba yotoqxonaga sarflashini ma’lum qildi. Bu haqda viloyat hokimligi axborot xizmati xabar berdi.
“Avvalo, ushbu masalani keng jamoatchilik e’tiboriga olib chiqqan OAVlarga rahmat. Har birimizning Vatanimizga bo‘lgan muhabbatimiz cheksiz. Ramzlari ham qadrli. Lekin buning uchun xalqdan, tadbirkorlardan kelayotgan mablag‘ evaziga bu qiymatdagi qurilishni bugungi vaziyatda sarflash befoydadek, chog‘i. Bu fikrni ijtimoiy tarmoqlarda ko‘pchilik yurtdoshlarimiz ham bildirib o‘tishibdi.
O‘zim ham davolanishda bo‘lganim sababli shifoxonada ushbu xabarni o‘qib qoldim. Muhtaram yurtboshimizning talab va maqsadlari xalqni rozi qilish, xalqning yashash sharoitlarini yaxshilashdan iborat bo‘lib turgan bir paytda bu kabi qurilish ishlariga o‘zim ham qarshiman.
Har kuni aholining yashash sharoitlarini yaxshilash maqsadida tuman va shaharlarda bo‘laman. Yaqinda Qarshi shahridagi 136-sonli oilaviy yotoqxonaga borib, uysiz fuqarolarimizning majburlikdan xarobaga aylangan binoda qo‘nim topgani meni qiynadi. Men bilan hamroh bo‘lgan rahbarlarning ham ozroq bo‘lsa-da, vijdoni qiynalgan bo‘lsa kerak. Ayrimlari hayot sinovlarini yengib o‘ta olmagan bo‘lsa ham, ularning shirindan shakar farzandlarida nima gunoh? Ular ham baxtli yashashga haqli”, — degan Zoir Mirzayev bayroq voqeasiga munosabat bildirar ekan.
Viloyat hokimi katta mablag‘ga ustun qurish haqidagi fikr jamoatchilik jig‘iga tegganini ta’kidlaydi.
“Eng katta kechirimlilikni, mehrni davlat rahbarimizning ‘Mehr’ operatsiyalari ko‘rsatib berdi. Ayollar va yuzlab begunoh bolalar yurtimizga qaytarilgan bir paytda yonimizdagi yotoqxona xaroba ahvolda bo‘lsa-yu, biz ustun quramiz, deb xalqning jig‘iga tegib o‘tirsak. Ushbu xaroba yotoqxonani ta’mirlash uchun 2,5-3 milliard so‘m atrofidagi mablag‘ manbasini qayerdan topishni bilmay turgandim. Ustun uchun sarflanishi reja qilingan 1 milliard 350 million so‘mni ushbu yotoqxona ta’miriga yo‘naltiramiz. Qolgan mablag‘ning ham manbasini topib, ushbu yotoqxonani katta tantana bilan topshiramiz. Mustaqilligimizning 30 yillik bayramiga ustun emas, fuqarolarimiz uchun shinam xonadonlar tuhfa qilamiz. Xo‘sh, nima deysizlar?”, — deya jamoatchilikka murojaat qilgan viloyat hokimi.
Zoir Mirzayev ustun qurilishi masalasiga ham to‘xtalib, “Biror homiy tomonidan ixtiyoriy qo‘llab-quvvatlansagina quriladi. Davlat budjetidan mablag‘ sarflanmaydi”, degan.
Eslatib o‘tamiz, avvalroq Oliy Majlis deputati Doniyor G‘aniyev Qarshida 1 milliard 350 million so‘mga qurilayotgan bayroq ustun masalasiga e’tibor qaratib, 2020-yil Farg‘onada ham shunday tashabbus ilgari surilganini, biroq viloyat hokimi bayroq ustun qurilishi uchun 1 milliard so‘m mablag‘ kerakligini eshitgach, tashabbuskorlarni haydab yuborganini ma’lum qilgandi. Qashqadaryolik bloger Umid Karimov esa viloyatning Dehqonobod tumanida qad rostlagan 40 metrlik bayroq 164 million 900 ming so‘mga tushganini, ko‘rinishi jihatidan shu bayroqdan farq qilmaydigan 62,5 metrlik bayroq esa 1 milliard 350 million so‘mga baholanayotganidan ajablanishini yozgandi.
Mavzuga doir: Qarshida balandligi 62,5 metrli bayroq o‘rnatiladi
Izoh (0)