Англия чемпионатида рамазон вақтида мусулмон футболчилар ифторлик вақтида оғзини очиб олиши учун танаффус жорий қилиниши мумкин. АПЛ лиганинг барча ҳакамларидан бу масалани муҳокама қилиб олишга чақирди, дея хабар қилмоқда Sky Sports.
«Лестер» ва «Кристал Пэлас» ўртасида бўлиб ўтган 26 апрель кунги ўйин футболчилар Уэсли Фофана ва Шайҳ Куяте ифторлик қилиб олиши учун бош ҳакам Грем Скотт томонидан маълум муддатга тўхтатиб турилди.
АПЛ қоидаларига кўра, ҳар икки жамоа сардорлари ўйиндан аввал ўзаро келишиб оладиган бўлса учрашувда кичик танаффус олишга рухсат этилган.
Бироқ Премьер Лига рамазон ойида ифторлик вақти келганда ўйинни бироз тўхтатиб туриш ва мусулмон футболчиларга оғизни очиб олиш имкониятини яратишни қоидалар қаторига киритмоқчи. Яъни ҳар бир ўйиндан аввал ҳакамлар футболчилар орасида рўза тутганлар бор ёки йўқлигини сўрайди ва шунга қараб ўйин вақтида кичик танаффус эълон қилиш масаласига ойдинлик киритади.
Бу қоида Премьер Лига 34-тури доирасида 30 апрель куни кечадиган «Саутҳэмптон» ва «Лестер» ўртасидаги учрашувдан бошлаб амалга киритилиши кутилмоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)