Қозоғистоннинг биринчи президенти Нурсултон Назарбоев Қозоғистон Халқ ассамблеяси (ҚХА)ни бошқариш ҳуқуқини амалдаги давлат раҳбари Қосим-Жўмарт Тўқаевга топширишга қарор қилганини эълон қилди, деб ёзади «ТАСС».
У Қозоғистон мустақиллиги арафасида яратилган ҚХА жаҳон стандартларига мос ягона давлат ва жамоат институтига айланганини эслатиб ўтди. «Ишончим комилки, бугунги қарор Ассамблея манфаатларига хизмат қилади ва президентимизга барча мавжуд ишлар ва келажак режаларини бирдамликда қуришда ёрдам беради», — деди мамлакатнинг биринчи раҳбари.
Ўз навбатида, Тўқаев Назарбоевга ҚХАнинг фахрий раиси бўлишни таклиф қилди. «Сизга, ҳурматли Нурсултон Абишевич, Ассамблеянинг фахрий раиси бўлиш ҳақидаги умумий таклифимизни қабул қилишингизни сўраб мурожаат қиламан. Ушбу мақом халқимиз ва давлатимиз олдидаги тарихий хизматларингиз туфайли ҳақли равишда сизга тегишли. Ишонаманки, барча Ассамблея аъзолари ушбу таклифни қўллаб-қувватлайди», — деди Тўқаев. Унинг сўзлари сессия иштирокчиларининг қарсаклари билан қаршиланди.
Назарбоев овозли таклифни қабул қилди. «Мен Ассамблея билан биргаликда ишлашда давом этаман», — дея қўшимча қилди у ва Тўқаевга миннатдорчилик билдириб, янги соҳада муваффақиятлар тилаб қолди.
Қозоғистон Халқ ассамблеяси — Республика президенти ҳузуридаги консултатив маслаҳат органи. ҚХАнинг асосий вазифалари — давлат миллий сиёсатини амалга ошириш, Қозоғистондаги ижтимоий ва сиёсий барқарорликни таъминлаш ва миллатлараро муносабатлар соҳасида давлат ва жамиятнинг фуқаролик институтлари ўзаро таъсирининг самарадорлигини ошириш. Ҳозирда Қозоғистонда 125 дан ортиқ миллат ва элат вакиллари яшайди, хусусан, қозоқлар, ўзбеклар, руслар, украинлар, немислар, корейслар, уйғурлар, қирғизлар, яҳудийлар, арманлар, грузинлар ва ҳоказо. Қозоғистоннинг биринчи президентига ҚХАни умрбод бошқариш ҳуқуқи берилган эди. Ассамблея сессияси юқори бошқарув органи бўлиб, уни Қозоғистон президенти зарурат бўйича, лекин йилига камида бир марта чақиради.
Изоҳ (0)