Қирғизистоннинг Боткен вилоятидаги Оқ-Сой, Оқ-Татир ва Самарқандек қишлоқларида Тожикистон билан чегарада юз берган ҳодиса муносабати билан фавқулодда вазият жорий қилинди. Бу ҳақда 24.kg нашри Боткен вилояти бўйича ҳукуматнинг ваколатли вакили матбуот хизматига асосланиб хабар бермоқда.
Хабарга кўра, қирғиз-тожик давлат чегарасидаги вазият 29 апрель, пайшанба куни эрталаб кескинлашди: ўқотар қурол ишлатилган, Қирғизистон фуқаролари орасида ярадорлар ҳам бор.
«29 апрель куни соат 04:40 да Қирғизистоннинг Боткен вилояти Боткен Кочо-Бою ҳудудида вазият кескин тус олди», — деб хабар берган Қирғизистон Миллий хавфсизлик давлат қўмитаси Чегара хизмати матбуотига таяниб.
Таъкидланишича, тожик томони ов милтиқлари билан Қирғизистон фуқароларининг транспорт воситаларини ўққа тута бошлаган. Бундан ташқари, Қирғизистон чегара хизмати тожикистонликлар Қирғизистон фуқаролари ва уларнинг уйларига тош отаётганини таъкидламоқда.
Чегара хизмати маълумотларига кўра Қирғизистон фуқаролари орасида ярадорлар бор. Қирғизистон томони чегарадаги можарода уч қирғизистонлик жароҳат олганини айтди. Тожикистон Миллий хавфсизлик давлат қўмитаси, ўз навбатида, ушбу можаронинг етти нафар қурбони ҳақида хабар берди.
Можарога тожикистонликлар томонидан электр узатиш симлари устунларига видеокамералар ўрнатилиши сабаб бўлган. 28 апрель куни Тожикистон «Бош сув ҳавзаси» участкаси ҳудудидаги электр узатиш симлари устунларига видеокамераларни ўрнатишни бошлади. Қирғизистоннинг чегара отряди ва Боткен вилоятидаги полиция ходимлари видеокамераларни ўрнатишни тўхтатишни талаб қилди. Можаро юз берган жойда, тахминан, 150 киши тўпланиб, бир-бирига тош отишни бошлади, маҳаллий аҳолидан бирининг кўзига ўқ узилган. Ҳаммаси бўлиб тўрт киши тиббий ёрдамга мурожаат қилган.
Қирғиз-тожик чегарасидаги воқеа юзасидан Қирғизистоннинг Боткен вилояти Ички ишлар бошқармаси жиноий иш қўзғади.
Қирғизистон Миллий хавфсизлик давлат қўмитаси Чегара хизмати сув иншоотида содир бўлган ҳодиса тожикистонликлар томонидан провокация қилингани тўғрисида баёнот берди.
«Гидроэлектр иншооти Тожикистон билан тўлиқ боғлиқлиги ва Қирғизистон фуқаролари уни бир томонлама эгаллаб олгани тўғрисида тожикистонликлар томонидан тарқатилган маълумотлар ҳақиқатга тўғри келмайди. Қирғизлар уни бир томонлама эгаллаб олгани ҳақиқат эмас. Ҳозирги вазиятни бундай баёнотлар билан ҳал қилиш ўрнига, тожик томони вазиятни янада оғирлаштирмоқда ва икки давлатнинг чегараолди минтақалари аҳолиси ўртасидаги мулоқотда келишмовчиликларни келтириб чиқармоқда», — деб таъкидлади Қирғизистон Чегара хизмати.
Баёнотда айтилишича, 1924—1927 ва 1989 йиллардаги хариталарга мувофиқ ушбу гидротехник иншоот тўлиқ Тожикистон Республикаси ҳудудида жойлашган, у 1968 йилда қурилган бўлиб, Тожикистон, Қирғизистон ва Ўзбекистоннинг чегарадош шаҳарлари ва вилоятларида қишлоқ хўжалиги экинларини суғориш учун мўлжалланган.
«Ховар» нашрининг ёзишича, бир кун олдин Тожикистоннинг Сўғд вилояти ва Қирғизистонинг Боткен вилояти раҳбарлари ўртасида учрашув бўлиб ўтган. Томонлар можарони минтақа вакиллари даражасида ҳал қилишга келишиб олган.
Давлат чегарасининг қирғиз-тожик қисми вақти-вақти билан икки мамлакат маҳаллий аҳолиси ёки чегарачилари ўртасидаги зиддиятлар зонасига айланади. Асосий сабаб — бу ажратилмаган ҳудудлар, уларда давлатлар ўртасидаги чегара қаердан ўтганини аниқлашнинг иложи йўқ.
Қирғизистон Миллий хавфсизлик давлат қўмитаси маълумотларига кўра, Тожикистон билан умумий чегара 972 км ни ташкил этади, шундан 519 км келишилган, 375 км келишилмаган ҳолда қолмоқда.
Мавзуга доир:
Изоҳ (0)