Ўзбекистонда йил охиригача барча мактаблар оптик толали интернет билан таъминланади. Бу ҳақда АОКАда ўтказилаётган матбуот анжуманида халқ таълими вазири ўринбосари Рустам Каримжонов маълум қилди.
«2020 йилда оптик толали алоқа линияларини тортиш ишлари 7155 та (71 фоиз) мактабларда амалга оширилган. 2021 йил якунига қадар бу кўрсаткични 10 008 та (100 фоиз)га етказиш кўзда тутилган.
Бугунги кунда интернет тармоғига уланган мактаблар «Education» тарифига уланган ва мактаб қувватидан келиб чиқиб, 10/40/100 Мбит/с тезликда ишлайди.
Бугунги кунда ички локал тармоқ ускуналари ҳамда Wi-Fi қурилмалар билан таъминланган мактаблар сони 4000 мингдан ошди. 2021 йил якунига қадар 7 мингга яқин мактаблар ички локал тармоқ инфратузилмаси билан таъминланади.
Шунингдек, келгусида барча мактабларни ва улардаги компьютерларни боғловчи ягона ‘Электрон таълим’ корпоратив тармоғи яратилиши кўзда тутилган», – деди Рустам Каримжонов.
Бундан аввал Ўзбекистон ташқи интернет каналининг тезлиги сониясига 1800 Гбитга етказилиши, Ўзбекистон аҳолисининг атиги 10 фоизи 4G интернети билан қамраб олингани айтилгани ҳамда Ўзбекистонда 2020 йилда ташқи интернет каналини кенгайтиришга эришилмагани ҳақида хабар берилганди.
Изоҳ (0)