O‘zbekistondan Ukraina shaharlariga borish va qaytish aviareyslarining narxi 300 dollarni tashkil qilishi mumkin

Ukrainaning SkyUp loukoster aviakompaniyasi yaqin vaqt ichida Kiyevdan Toshkentga va Lvovdan Samarqandga doimiy aviareyslarni boshlashga tayyor. Ikki tomonga uchish chiptasi narxining 300 dollar atrofida bo‘lishi kutilmoqda. Bu haqda Ukrainaning O‘zbekistondagi elchisi Nikolay Doroshenko “Dunyo” axborot agentligiga ma’lum qildi.

“Mening asosiy ustuvor maqsadim Ukraina va O‘zbekiston o‘rtasidagi to‘g‘ridan to‘g‘ri aviaqatnovni ochish hisoblanadi”, — deya ma’lum qilgan Nikolay Doroshenko.

Uning fikriga ko‘ra, bu biznes uchun qulay sharoit yaratishi, mehnat va akademik mobillikka xizmat qilishi, hududlarning turistik salohiyatini amalga oshirishi va yakunda qarindoshlari va yaqinlari ikki mamlakatda yashayotgan oilalarning hayotini yaxshilashi kerak.

“Mening fikrimcha, mamlakatlarimizni yaqinlashtirish uchun to‘g‘ridan to‘g‘ri aviareysdan ko‘ra samarali usulni o‘ylab topish qiyin. Bu loyihaning o‘zbekistonlik hamkasblar tomonidan qo‘llab-quvvatlanishiga katta umid bildiraman”, — deya ta’kidlagan diplomat.

Avvalroq Ukrainaning SkyUp Airlines aviakompaniyasi Toshkent va Kiyev o‘rtasida muntazam qatnovlarni yo‘lga qo‘yishni rejalashtirayotgani haqida xabar berilgandi. Shuningdek, Ukrainaning Windrose aviakompaniyasi Kiyev–Toshkent yo‘nalishida reyslarini amalga oshirishni rejalashtirmoqda.