Россия Украина чегараларидан қўшинларини қисман — фақат Қримдан олиб чиқишни бошлади, аммо шарқий чегаралар яқинида, масалан, Воронеж вилоятида ҳарбийлар ҳали чекинмаган. Бу ҳақда Украина Давлат чегара хизмати раҳбари Сергий Дейнеко маълум қилди, деб ёзади «РБК».
«Россия мудофаа вазири Сергей Шойгу 23 апрелдан Россия қўмондонлиги қўшинларни олиб чиқишни бошлаши тўғрисида эълон қилганидан сўнг бизнинг разведкамиз бу жараён қисман бошланганини кузатмоқда. Айни пайтда ушбу жараён вақтинча босиб олинган Қрим ҳудудида амалга оширилаётганини кўряпмиз», — деди у.
Дейнеконинг сўзларига кўра, Украинанинг шарқий чегараларидаги қўшинлар ҳалигача чекинмаган. Хусусан, Воронеж вилоятидаги дала лагерлари ўз жойида қолмоқда.
Дейнеко Россия ўз қўшинларини Украина чегараларидан олиб кетади, дейишга ҳали эрталигини айтди.
Мудофаа вазири Сергей Шойгу 22 апрель куни жанубий чегаралардаги машғулотлардан сўнг Россия қўшинларини доимий жойларига қайтариш тўғрисида буйруқ берди. Қўшинларни олиб чиқиш 23 апрелда бошланди, жараён 1 майга қадар якунланиши керак.
Украина президенти Владимир Зеленский Россия қўшинлари олиб чиқиб кетилгандан кейин чегарада кескинлик пасайишини айтди.
22 апрель куни Қримдаги Опук полигонида Шойгу бошчилигида Жанубий ҳарбий округ кучлари ва ҳаво-десант кучлари машғулотларининг асосий босқичи бўлиб ўтган эди. Машғулотларда 10 мингдан ортиқ аскар, 1200 та қурол ва ҳарбий техника, шунингдек, 40 дан ортиқ ҳарбий кема иштирок этган.
Wall Street Journal (WSJ) газетаси Россиянинг Қрим ва Воронеж вилоятидаги ҳарбий техникаларининг сунъий йўлдошдан олинган суратларини чоп этди.
Аввалроқ Франция президенти Эммануэль Макрон, Германия канцлери Ангела Меркель ва Украина президенти Владимир Зеленский Донбассдаги можаронинг авж олишига йўл қўймаслик учун Россия ўз қўшинларини Украина билан чегарадан олиб кетиши кераклигини айтганди.
Шунингдек, Байден ва Ангела Меркель Россияни Украина билан чегарадаги қўшинларини олиб кетишга чақирган эди. Унгача Россия Украина чегарасига ва Қримга 40 минг нафардан аскар жўнатгани ҳақида хабар берилган. Украина президенти Владимир Зеленский Россияни «жиловлаш»да Байдендан ёрдам сўраган. Кремль эса Россия ва Украина ўртасидаги уруш эҳтимолини истисно қилган.
Изоҳ (0)