Франциянинг истеъфодаги генераллари ва зобитлари мамлакат президенти Эммануэль Макронга ирқий уруш ва давлат тўнтариши хавфи ҳақида огоҳлантирувчи очиқ хат ёзди. Уларнинг мактуби Valeurs aktuelles нашрида эълон қилинди, деб ёзади «Интерфакс».
Хабарга кўра, мактубда истеъфодаги генераллар ва зобитлар юздан ортиқ диний ақидапарастлар ва экстремистларнинг француз конституциясига зид ҳаракатлари оқибатида келиб чиқадиган фуқаролар уруши хавфини қайд этган.
«Зўравонлик кун сайин ортиб бормоқда. Ўн йил олдин ким айта оларди, ўз коллежидан кетаётган профессорнинг боши кесилади деб?» — таъкидлайди мактуб муаллифлари.
Шунингдек, улар Макрон жим қараб турса, давлат тўнтариши содир бўлиши мумкинлиги ҳақида огоҳлантирди.
«Кўриб турганимиздек, ортга суришга вақт йўқ, акс ҳолда, тобора кучайиб бораётган бу бетартибликка эртага ички уруш чек қўяди ва сизнинг зиммангизга тушадиган ўлимлар бир неча мингни ташкил қила бошлайди», — дея хулоса қилди истеъфодаги ҳарбийлар.
Оммавий ахборот воситаларида эълон қилинган мурожаат ўнгчилар етакчиси Марин Ле Пен ва мингга яқин фаол армия зобитлари ва аскарлари томонидан қўллаб-қувватланди, деб хабар бермоқда BBC News.
Қуролли кучлар вазири Флоренс Парлей Қуролли кучлар аъзоларига сиёсий ёки диний мавзуларда фикр билдириш тақиқланганини эслатиб ўтди. «Қоидабузарларга қарши санкцияларни қўллаш режалаштирилмоқда», — дея қўшимча қилди у.
Аввалроқ Макрон Париж яқинида полициячининг ўлдирилишини диний экстремизм деб атаган эди. Қотиллик полиция участкасининг кираверишида содир этилган. Жиноятчи бинога кираётган аёлга ҳужум қилиб, унинг томоғига пичоқ урган. Бошқа полиция ходимлари жиноятчига қарата ўқ узган ва у воқеа жойида ҳалок бўлган.
Эслатиб ўтамиз, 2020 йилнинг октябрь ойида Францияда тарих фани ўқитувчиси ўқувчиларга Charlie Hebdo нашри томонидан чоп этилган Муҳаммад Пайғамбар (с.а.в.)нинг карикатура суратини кўрсатган. Шундан сўнг ўқитувчи чеченистонлик 18 ёшли муҳожир томонидан ўлдирилган. Бу воқеа Францияда кенг жамоатчиликнинг муҳокамасига сабаб бўлди. Ўлдирилган ўқитувчи билан видолашиш маросимида Франция президенти Эммануэль Макрон мамлакат сўз эркинлигидан, жумладан, карикатура борасидаги эркинликдан воз кечмаслигини маълум қилган. Франция президентининг мазкур баёноти ортидан Яқин Шарқдаги баъзи мамлакатларда Францияда ишлаб чиқарилган маҳсулотларни бойкот қилиш бошланди.
Макрон бу қотилликни «Ислом террорчилигига хос хатти-ҳаракат» деб атади. У, шунингдек, Ислом дини «бутун дунёда инқироз ҳолатини бошдан кечираётгани» ҳақида фикр билдирди.
Макроннинг бу гаплари кўплаб давлатларда мусулмонларнинг ғазабига сабаб бўлди. Улар Франция ва Макронга қарши норозиликлар билдира бошлади. Баъзи намойишчилар Франция байроғи ва Макроннинг суратларини топтаган. Бундай норозилик акциялари Покистон, Ливан, Туркия, Фаластин ва бошқа давлатларда бўлиб ўтди.
Кейинчалик Макрон Муҳаммад (с.а.в.) карикатуралари туфайли мусулмонларда пайдо бўлган ҳис-туйғуларни тушунишини айтди, аммо уларни ҳукумат эмас, мустақил ОАВлар чиқараётганини таъкидлади.
2015 йил январь ойида ҳам бир нечта қуролланган одамлар Charlie Hebdo таҳририяти офисига бостириб кириб, 12 кишини отиб ташлаган эди, улардан саккиз нафари журналист бўлган. Ҳужум учун жавобгарликни Ал-Қоиданинг Ямандаги йўналиши ўз зиммасига олган. Террорчилар Charlie Hebdo таҳририятини ўз нишонига айлантирган, чунки нашр бир неча бор Пайғамбар Муҳаммад (с.а.в.)нинг карикатураларини чоп этган. Charlie Hebdo ҳужуми Франциядаги исломчилар томонидан уюштирилган қатор ҳужумларнинг бошланиши бўлди.
Изоҳ (0)