Россия Ташқи ишлар вазирлиги 28 апрель куни Болтиқбўйи давлатларининг элчиларини чақириб, илгари россиялик дипломатларнинг Болтиқбўйи мамлакатларидан чиқариб юборилгани муносабати билан жавоб чораларини эълон қилди. Бу ҳақда Ташқи ишлар вазирлигига таяниб «РБК» хабар берди.
Вазирликда Болтиқбўйи давлатлари элчиларига россиялик «ходимларни ҳайдаб чиқариш бўйича провокацион, асоссиз ҳаракатлар билан боғлиқ» кескин норозилик билдирилган.
Россия Литва элчихонасининг икки ходимини, шунингдек, Латвия ва Эстония элчихоналарининг бир нафардан ходимини етти кун ичида мамлакатни тарк этишга буюрди.
Шунингдек, Москвадаги Словакия элчиси ҳам Ташқи ишлар вазирлигига чақирилди.
«Словакия томонидан Братиславадаги Россия элчихонасининг уч нафар ходимига ноқонуний фаолият юритиши тўғрисида ассосиз равишда абсурд ва сохта айблов эълон қилингани муносабати билан Словакия элчиси қаттиқ норозилик олди», — дейилади ТИВ хабарида.
ТИВ баёнотида Словакия ҳукуматининг хатти-ҳаракатлари «Чехия билан ёлғон бирдамликни намойиш этиш тўғрисидаги» қарор деб номланган.
Москва Словакия элчихонасининг уч нафар ходимини persona non grata деб эълон қилди. Улар 5 майга қадар мамлакатдан чиқиб кетиши керак.
Аввалроқ Чехия Евроиттифоқ ва НАТОдан бирдамлик белгиси сифатида Россия разведкачиларини ўз мамлакатларидаги элчихоналардан чиқариб юборишни сўраган эди. «Биз Россия разведка ходимларининг умумий депортациясига қаратилган жамоавий ҳаракатларга чақирамиз», — деган эди ўша вақтда ташқи ишлар вазири вазифасини вақтинча бажарувчи Ян Гамачек.
23 апрель куни Болтиқбўйи мамлакатлари россиялик дипломатларни чиқариб юбориши ҳақида маълум қилди: Литва Россия элчихонасининг икки нафар ходимини, Латвия ва Эстония бир нафардан ходимини ўз ҳудудидан чиқариб юборишга қарор қилди.
Бунгача Словакия уч нафар россиялик дипломатни ўз ҳудудидан чиқариб юборишга қарор қилган эди. Ўшанда мамлакат бош вазири Эдуард Хегернинг таъкидлашича, Словакия махсус хизматлари маълумотлари ўрганиб чиқилгандан сўнг «ҳозирги пайтдаги геосиёсий аҳвол, шунингдек, Чехиядаги вазият сабабли» шундай қарор қабул қилинган.
Чехия Россияни 2014 йил 17 апрелда Моравиянинг жануби-ғарбий қисмидаги ўқ-дорилар омборида содир бўлган портлашларга алоқадорликда айблаганидан кейин улар ўртасидаги кенг кўламли сиёсий-дипломатик низо пайдо бўлди. Шундан сўнг Прага қиймати 6 миллиард евро бўлган «Дуковани» атом электр станциясининг янги энергия блокини қуриш бўйича тендерда иштирок этиш учун «Росатом» давлат корпорациясининг номзодлар сафидан чиқарилишини эълон қилди.
Бунинг ортидан Чехия 18 нафар россиялик дипломатни мамлакатдан чиқариб юборди. Бунга жавобан Москва ҳам 20 нафар чехиялик дипломатни мамакатдан чиқариб юборди. 22 апрель куни Чехия ташқи ишлар вазири Прагада россиялик дипломатлар сонининг чекланиши ҳақида маълум қилди: уларнинг сони Москвадаги Чехия дипломатик ваколатхонасининг ходимлари сони (7 киши) билан тенглаштирилади. Элчихона ходимларининг мамлакатни май ойининг охиригача тарк этиши белгиланган.
Изоҳ (0)