Буюк Британиянинг Post Office компанияси бир неча ўн йиллар давомида савдо ҳисоби учун мўлжалланган Horizon иловасидан дастур кодида хатолик бўлган ҳолда фойдаланиши натижасида почтачиларнинг кўпчилиги судга тортилган эди. «Буюк Британиянинг энг йирик суд жараёни» ҳақида BBC News хабар берди.
Таъкидланишича, Post Office Япониянинг Fujitsu компаниясига тегишли махсус Horizon дастуридан фойдаланган. 2000—2014 йиллар давомида тизимдан олинган маълумотлар асосида 736 нафар почтачи жиноий жавобгарликка тортилган (ҳафтасига ўртача бир нафардан).
Уларнинг баъзилари ёлғон хабар ва ўғрилик учун қамоққа олинган бўлса, яна кўпчилиги жаримага тортилиб, оиласи ва мол-мулкидан айрилган.
Орадан 20 йил ўтгач собиқ ходимлар компьютер тизимининг нотўғри ишлаганини даъво қилиб, ўзларининг ишини қайта кўриб чиқиш учун судда ғалаба қозонди. Лондон Қироллик суди 23 апрель куни Post Office ходимларига нисбатан 39 та оқлов ҳукмини чиқарди.
Ҳукм эълон қилинганда компания Horizon дастурий таъминотининг ишончлилигига «ҳаддан ортиқ ишонгани»ни тан олди. Маълумот учун, 2019 йилда Post Office 555 нафар жабрланувчига компенсация тўлаган эди, ўшанда компания бухгалтерия тизимидаги муаммолардан жабр кўрган ходимларга товон пули тўлашнинг яхлит тизимини ташкил этган эди.
BBC маълумотларига кўра, Post Office’дан товон пули олиш учун жами 2400 дан ортиқ ариза берилган. Вақт ўтиши билан уларнинг сони ортиши ва тўловларнинг бир қисмини қоплаш учун давлат аралашуви талаб қилиниши мумкин.
Шунингдек, компания Horizon дастуридан бугунги кунгача фойдаланиб келади. Келажакда уни бошқа дастурий таъминотга алмаштириш режалаштирилган.
Изоҳ (0)