Туркияда коронавирус эпидемиясининг авж олиши муносабати билан 29 апрелдан 17 майгача тўлиқ локдаун жорий этилмоқда. Бу ҳақда мамлакат президенти Ражаб Тоййиб Эрдўғон маълум қилди деб ёзади «РБК».

Фото: «Дарё»

«Бугун Вазирлар Маҳкамасининг йигилишида эпидемия билан боғлиқ сўнгги воқеаларни баҳоладик. Рамазондан кейин вазият яхшиланиши учун касалланиш кўрсаткичлари анча паст бўлиши керак. Биз инфекция юқтираётганлар сонининг кунлик ўсишини 5 мингдан камайтиришимиз лозим», — деди Эрдўғон.

Туркияда 29 апрелдан 17 майгача:

  • шаҳарлараро саёҳатларга чеклов қўйилди, ҳудудлар ўртасида ҳаракатланиш учун рухсатнома талаб қилинади;
  • мактабларда қатнаб ўқиш тўхтатилади, болалар боғчалари ёпилади;
  • жамоат транспортининг бандлик даражаси 50 фоиздан ошмаслиги керак;
  • аксарият муассасалар ёпилади, Ички ишлар вазирлигининг махсус рўйхатига киритиладиган муассасалар бундан мустасно.

Чекловлар 29 апрель, пайшанба куни соат 19:00 дан кучга киради ва 17 май, душанба куни соат 05:00 да тугайди.

Бунгача Туркия ҳукумати мамлакатда коронавирус тарқалишининг кучайиши фонида 23–25-​​апрель кунлари тўлиқ комендантлик соати ўрнатган эди.

Туркияда март ойининг охирида коронавирус қайта авж ола бошлади. Шундан сўнг мамлакат президенти Тоййиб Ражаб Эрдўғон 58 та шаҳарни COVID-19 юқтириш хавфи юқори бўлган қизил ҳудуд дея эълон қилди. Мазкур шаҳарларда Туркия аҳолисининг 80 фоизи истиқомат қилади.

 Жонс Ҳопкинс университети маълумотларига кўра, Туркияда COVID-19 пандемияси бошланганидан бери 4,6 миллион кишида коронавирус аниқланган. Ушбу кўрсаткич бўйича мамлакат дунёда олтинчи ўринда туради. Туркияда коронавирус оқибатида 38,3 минг киши вафот этган. Сўнгги ҳафталарда мамлакатда кунига 30 мингдан 60 мингга қадар касалланиш ҳолати қайд этилди (16 апрелда 63 минг), эпидемиянинг биринчи тўлқини юз берган 2020 йилнинг баҳорида бу кўрсаткич кунига 2-4 минг ҳолатни ташкил этган эди.

Аввалроқ Россия 15 апрелдан 1 июнгача Туркияга доимий ва чартер рейсларни тўхтатиши ҳақида эълон қилганди. Шунингдек, Россия билан бир қаторда Хитой ва бошқа мамлакатлар ҳам Туркия билан парвозларни тўхтатишга қарор қилди.  Хитойнинг фуқаро авиацияси маъмурияти (CААC) турк авиакомпанияларига 19 апрелдан бошлаб тўрт ҳафта давомида парвозларни тўхтатишга буйруқ берилганини эълон қилди.