Turkiyada koronavirus epidemiyasining avj olishi munosabati bilan 29-apreldan 17-maygacha to‘liq lokdaun joriy etilmoqda. Bu haqda mamlakat prezidenti Rajab Toyyib Erdo‘g‘on ma’lum qildi deb yozadi “RBK”.
“Bugun Vazirlar Mahkamasining yigilishida epidemiya bilan bog‘liq so‘nggi voqealarni baholadik. Ramazondan keyin vaziyat yaxshilanishi uchun kasallanish ko‘rsatkichlari ancha past bo‘lishi kerak. Biz infeksiya yuqtirayotganlar sonining kunlik o‘sishini 5 mingdan kamaytirishimiz lozim”, — dedi Erdo‘g‘on.
Turkiyada 29-apreldan 17-maygacha:
- shaharlararo sayohatlarga cheklov qo‘yildi, hududlar o‘rtasida harakatlanish uchun ruxsatnoma talab qilinadi;
- maktablarda qatnab o‘qish to‘xtatiladi, bolalar bog‘chalari yopiladi;
- jamoat transportining bandlik darajasi 50 foizdan oshmasligi kerak;
- aksariyat muassasalar yopiladi, Ichki ishlar vazirligining maxsus ro‘yxatiga kiritiladigan muassasalar bundan mustasno.
Bungacha Turkiya hukumati mamlakatda koronavirus tarqalishining kuchayishi fonida 23–25-aprel kunlari to‘liq komendantlik soati o‘rnatgan edi.
Turkiyada mart oyining oxirida koronavirus qayta avj ola boshladi. Shundan so‘ng mamlakat prezidenti Toyyib Rajab Erdo‘g‘on 58 ta shaharni COVID-19 yuqtirish xavfi yuqori bo‘lgan qizil hudud deya e’lon qildi. Mazkur shaharlarda Turkiya aholisining 80 foizi istiqomat qiladi.
Izoh (0)