Ekvadordagi prezidentlik saylovlarida sobiq bankir g‘olib bo‘ldi

Ekvadorda “KREO harakati” o‘nglar partiyasi vakili, sobiq bankir Gilermo Lasso prezidentlik saylovlarida g‘olib chiqdi. Bu haqda Tengrinews xabar berdi.

Saylov byulletenlarining 98,05 foizi hisoblab chiqilganidan keyin Lasso prezidentlik saylovining ikkinchi turida 52,48 foiz ovoz to‘pladi.

Uning raqibi, “Umid uchun birlik” so‘llar partiyasining vakili Andres Araus 47,52 foiz ovoz to‘plab, saylov natijalari e’lon qilinmasidan oldin mag‘lubiyatini tan oldi.

“Bugun barcha ekvadorliklar o‘zlarining kelajagini hal qildi, ular o‘zining saylovda bergan ovozi bilan o‘zgarishlarga ehtiyoji va yaxshi kunlarga bo‘lgan umidini bildirdilar”, — dedi Lasso saylovchilarga tashakkur bildirib va saylovoldi va’dalarini amalga oshirishini aytdi.

O‘z navbatida, Araus raqibini g‘alaba bilan tabrikladi va saylovlardagi muvaffaqiyatsizlik siyosiy yoki ruhiy mag‘lubiyat emasligini ta’kidladi.

Ekvadorning amaldagi prezidenti Lenin Moreno ham Lassoni saylovlardagi g‘alabasi bilan tabriklab, yangi davlat rahbariga “ekvadorliklar manfaati yo‘lida katta muvaffaqiyatlar” tiladi.

Gilermo Lasso avval ham Ekvador prezidentligiga ikki marta o‘z nomzodini qo‘ygan, lekin ikkalasida ham yetarlicha ovoz to‘play olmagan. Sobiq bankir iqtisodiyot va erkin bozorni rag‘batlantirish uchun soliq stavkalarini tushirish, xalqaro tashkilotlar bilan hamkorlik qilish, shuningdek, davlat qarzlarini qisqartirish bo‘yicha choralar ko‘rish tarafdori hisoblanadi.

Avvalroq Kongo respublikasida o‘tgan prezidentlik saylovlarida amaldagi davlat rahbari Deni Sassu-Ngesso g‘alaba qozongan edi. U dastlabki natijalarga ko‘ra 88,57 foiz ovoz olgan va saylovning ikkinchi turini o‘tkazmaslikka qaror qilingan.