Европада 2020 йил метеорологик кузатувлар тарихида 150 йил ичидаги энг иссиғи бўлди. Бу ҳақда Reuters хабар берди.
«Европада ҳарорат ҳар фаслда кўтарилган», — деди Европа Иттифоқининг Copernicus Earth деб номланган Ерни кузатиш дастурининг катта илмий ходими Фрея Вамборг АҚШдаги экология саммитида.
2020 йил 1850 йилдан буён кузатилган энг илиқ йил бўлди. 2020 йилда Европада ўртача йиллик ҳарорат аввалги энг илиқ беш йилга қараганда камида 0,4 даража юқори бўлди, шунингдек, уларнинг барчаси сўнгги ўн йилликка тўғри келди.
Қишнинг ўртача ҳарорати 3,4 даражага юқорилади. Иссиқлик тўлқинлари сўнгги йиллардаги каби кучли ва узоқ давом этмаган бўлса-да, ёз ҳам тарихдаги энг иссиғи бўлди. Лекин Скандинавия ва Францияда рекорд даражадаги иссиқнинг ўчоқлари қайд этилди.
Ўз навбатида, Вамборг Арктикадаги вазиятни «ажойиб» деб атади. Шунингдек, мутахассис Сибирда ўта юқори ҳарорат ва қор қопламининг пасайиши оқибатида келиб чиққан ўрмон ёнғинлари ҳақида гапирди. Умуман олганда, Сибирдаги ҳарорат 1981—2020 йиллардаги ўртача кўрсаткичдан 4,3 даража юқори бўлди.
Эслатиб ўтамиз, аввалроқ дунё раҳбарлари иштирокидаги иқлим ўзгариши бўйича саммитда АҚШ, Хитой, Франция, Германия, Россия, Ҳиндистон, Канада, Япония давлатларининг етакчилари нутқ сўзлади.
Маълумот учун, Корнелл университети томонидан АҚШ Қишлоқ хўжалиги вазирлиги кўмагида олиб борилган тадқиқотга кўра, иқлим ўзгариши оқибатида қишлоқ хўжалигининг умумий миллий маҳсулдорлиги 1960 йиллардан буён 21 фоизга пасайган. Бундай пасайиш сўнгги етти йил ичидаги маҳсулдорликнинг ўсишини йўқотиш билан тенгдир, дея таъкидлайди олимлар.
Изоҳ (0)