«Дарё» интернет-нашри мухбири Отабек Қўлдошевга нисбатан қўполлик қилган Қарши шаҳар Ички ишлар органлари (ИИО) фаолиятини мувофиқлаштириш бошқармаси (ФМБ) бошлиғи ўринбосари Азамат Шаймардановга нисбатан «қаттиқ ҳайфсан» интизомий жазоси қўлланилди. Бу ҳақда Қашқадарё вилояти ИИБ матбуот хизмати 26 апрель куни маълум қилди.
Отабек Қўлдошев 2021 йилнинг 16 апрель куни Қарши шаҳридаги Кўк гумбаз жоме масжидидан Рамазон ойининг биринчи жума намозидан фоторепортаж тайёрлаётган вақтида Қарши шаҳар ИИО ФМБ бошлиғи ўринбосари Азамат Шаймардановнинг қаршилигига учраган эди.
Шаймарданов журналистнинг иш қуролини зўрлик билан тортиб олиб, қўл остидаги ходимларга Отабек Қўлдошевни «олиб бориб, тиқиб қўйиш»ни буюрган. Журналист ИИО ФМБнинг махсус автомобилида ярим соат олиб юрилиб, охири Қарши шаҳар ИИО ФМБ 1-сонли ички ишлар бўлими (ИИБ)га етказилган.
«Дарё» таҳририяти воқеадан хабар топиши билан Ички ишлар вазирлиги (ИИВ) матбуот котиби Шоҳрух Ғиёсов билан боғланган, шунингдек, қашқадарёлик бир гуруҳ журналист ва блогерлар Қарши шаҳар ИИО ФМБ 1-сонли ИИБ олдида тўпланган. Кўп ўтмай ИИБга Қарши шаҳар ИИО ФМБ бошлиғи Б.Мирзаев ва вилоят ИИБ ахборот хизмати раҳбари Ирода Расулова ҳам етиб келган. Масъуллар журналист нима сабабдан бўлимга олиб келингани юзасидан тайинли ахборот бермай, қўполлик қилган ходимга чора кўрилишини билдирган.
Юзага келган вазият юзасидан ИИВ матбуот хизмати ҳам баёнот бериб, «мухбир Отабек Қўлдошев билан суҳбат жараёнида касб этикасини бузган ички ишлар органи ходимининг ҳаракатлари ўрганиб чиқилиб, ҳуқуқий баҳо берилиши»ни маълум қилганди. Ҳодиса ижтимоий тармоқларда акс-садо бериб, вазиятга, жумладан, Масс-медиа фонди раҳбари Комил Алламжонов ва АОКА ҳам муносабат билдирган эди. Жумладан, агентлик «бу каби ҳолатлар давлат сиёсатига зид» эканлигини алоҳида таъкидлаган. Қашқадарё вилояти ҳокими Зоир Мирзаев эса Отабек Қўлдошев билан суҳбатда «иш унинг назоратида экани, айбдорга қонуний чора кўрилиши»ни билдирган эди.
Қашқадарёлик журналист ва блогерлар хавотирда
«Дарё» Қашқадарё ИИБнинг баёноти эълон қилиниши арафасида қашқадарёлик журналист ва блогерларнинг вазият юзасидан фикрларини ўрганган эди. Эътиборга молик томони, жамоатчилик фаоллари журналистга нисбатан қўполлик қилган ички ишлар органи ходимига нисбатан қаттиқ жазо тайинланишига ишонмаслигини вилоят ИИБ баёнотидан аввал билдирган эди.«Қашқадарё вилоят ИИБ ахборот хизмати айни кунга қадар тизимда хатога йўл қўйган ходимга кескин чора кўргани ҳақида бирор марта хабар бермаган. Демак, ё бошқарма ахборот хизмати бундай маълумотни яширган, ёки тизимда ўзбошимча ходимларга умуман чора кўрилмайди», — дея тахмин қилади блогер Отабек Артиков.
«Тўғриси, ИИВдан ижобий натижа кутмаяпман. Журналистга қилинган муносабатни кўриб, мен ИИБ ходимларини совет даври милиционерларига ўхшатдим. Ўша пайтда ИИБ кучишлатар тизим эди. Афтидан, Қашқадарёдаги ИИБ ходимлари ҳам ўзини ҳамон кучишлатар тизим вакиллари деб билади. Шу боис менда тизимга нисбатан шубҳа бор», — деди блогер.
«Бўлиб ўтган воқеа видеосини кўргач, менда эски замон қайтдимикин, энди ИИБ ходимларини телефон ёки камерада тасвирга олиш мумкин эмасмикин, яна ўшандай ‘олиб бориб тиқ’, ‘қама’, ‘кўзига кўрсатиб қўй’, деган тамойил бўйича иш олиб бориляптими, деган ҳадик пайдо бўлди», — дейди бошқа бир блогер Мақсуд Музаффаров.
Блогер Отабек Артиков эса мазкур жараёнда Қашқадарё вилояти ИИБ ахборот хизмати раҳбари Ирода Расулованинг «журналист ёки блогер кўчада хизмат гувоҳномасини ёки бейжигини олиб юриши керак» дея фикр билдирганини ҳам қоралади (қайд этиш жоиз, Отабек Қўлдошев масжиддан репортаж тайёрлаётган вақтида хизмат гувоҳномаси ёнида бўлмаган, у гувоҳномасини ИИБ ходимлари сўрагач машинасидан олиб келган).
«Ирода Расулова ўша ҳолатда ҳам журналистни айбдорга чиқармоқчи бўлди. Бу эса менда ҳадик пайдо бўлишига, эртага мен ҳам ‘Дарйў мухбири тушган ҳолатга тушиб қолмасмикинман деган қўрқув пайдо бўлишига сабаб бўлди. Ваҳоланки, блогерларда хизмат гувоҳномаси ҳам, бейжик ҳам бўлмаслигини ёш бола ҳам билади. ИИБ ахборот хизмати раҳбари шундай деб тургач, ходимларидан нимани кутамиз?!», — дейди блогер Отабек Артиков.
«Президент сиёсатига хиёнат»
Ушбу кўнгилсиз воқеа президент Шавкат Мирзиёев оммавий ахборот воситаларига катта ишонч билдираётган ва ҳурмат кўрсатаётган, уларнинг ходимларини «елкадош», «ёрдамчи» деб атаётган вақтда юз бергани янада ачинарли. Блогер Мақсуд Музаффаров бу борада кескин муносабат билдиргани ҳам тушунарли.«Вилоят ИИБдан тизимдаги ходимларга журналист ва блогерлар билан мулоқот қилишни, ишлашни ўргатишларини талаб қилиб қолардим. Боиси президентимизнинг бугунги ОАВга бўлган ҳурмати чексиз. Журналистга қилинган муносабат эса Президентнинг бугунги кундаги сиёсатига хиёнат деб ҳисоблайман», — дейди у.
«Ҳуқуқ» газетасининг Қашқадарё вилоятидаги мухбири Норбўта Ғозиев ҳам шу фикрда: «Президент журналистларга ‘Сизлар менга елкадошсиз, ёрдамингизга таянаман, адолатни етказишдан тўхтаманглар, қўрқманглар, ортингизда президент турибди’, деб турган бир пайтда, журналист ва блогерларга нисбатан ноҳақ, турли тазйиқлар ўтказган ИИБ ходимлари жазоланганидан кейин ҳам бундай ҳолатнинг такрорланиши соҳа ходимлари учун уят».
«Бундай ходим ишдан бўшатилиши керак»
Блогер Фаррух Файзиевнинг сўзларига кўра, фуқарога қўполлик қилган ходимнинг узр сўраш ёки ҳайфсан олиш билан қутилиб кетиши ИИВ тизимидаги ўзбошимча ходимлар сони кўпайишига сабаб бўлиши мумкин. Айни вақтда, бошқа бир гуруҳ блогерлар, қўпол ходимга нисбатан кескин жазо тайинланишига ишонмаса-да, аслида у ишдан бўшатилиши кераклигини таъкидламоқда.
«Вазирлик ўз ходимга чора кўришига унчалик ишонмайман. Хизмат текшируви ўтказилмоқда, чора кўрамиз дейишади ва шу билан ҳаммаси унутилади. ЙПХ инспекторларининг ИИБ ходими номига доғ тушириши ҳолатларини исботлаб берамиз, аммо улар доим узр сўраш ва танбеҳ олиш билан қутилиб қолади. Аслида президентнинг 3413-сонли қарори бор, унга кўра, ИИБ ходими номига доғ туширган ходимга ишдан бўшатишгача бўлган чора қўлланилиши керак. Фикримча, журналистга қилинган муносабат учун бу ходим ишдан бўшаши керак», — дея қўшимча қилди Мақсуд Музаффаров.
Капитан Каримов тахаллуси билан фаолият олиб борувчи блогер Умид Каримовнинг таъкидлашича, амалдаги тизимда мансабдор ходимнинг ишдан бўшатилиши ҳам унинг учун етарлича жазо эмас, чунки аксарият ҳолларда бундай ходимлар шов-шувлар тиниб, эътибор сусайгач, бирор қуйи лавозимда, масалан, туман бўлимида иш бошлайди. «Тахминимча, ишдан олинса ҳам, қайсидир туманга ишга қўйилади», — дейди блогер.
Қашқадарё вилоят ИИБнинг 26 апрелдаги баёнотида таъкидланишича, «‘Ички ишлар органлари ходимларининг одоб-ахлоқ қоидалари’нинг тегишли бандлари ҳамда ИИО фаолиятини тартибга солувчи меъёрий буйруқлар талабларини қўпол равишда бузиб, фуқароларда ИИОларига нисбатан салбий фикрлар уйғонишига сабабчи бўлгани учун Қарши шаҳар ИИО ФМБ бошлиғининг ўринбосари Азамат Шаймардановга нисбатан ‘қаттиқ ҳайфсан’ интизомий жазоси қўлланди». Хизмат текшируви хулосаси нусхаси ва тўпланган ҳужжатлар ҳуқуқий баҳо бериш учун Қарши шаҳар прокуратурасига юборилган — тайинланган жазонинг қанчалик ҳаққоний ва қонунийлигига энди прокуратура органлари баҳо беради.
Изоҳ (0)