Россиянинг Узоқ Шарқ федерал округида молиявий қийин аҳволга тушиб қолган 9 нафар ўзбекистонлик мамлакатга чартер рейс орқали бепул қайтарилди. Бу ҳақда Ташқи меҳнат миграцияси агентлиги хабар берди.
Ташқи меҳнат миграцияси агентлиги, ваколатли ташкилотлар ва сахий инсонлар кўмагида пандемия шароитида хорижда мураккаб молиявий аҳволга тушиб қолган ҳамда ижтимоий ҳимояга муҳтож Ўзбекистон фуқароларини қўллаб-қувватлаш, моддий-ҳуқуқий ёрдам кўрсатиш, уларни ватанга қайтаришга алоҳида эътибор қаратилмоқда.
Хусусан, Узоқ Шарқ федерал округи ҳудудларида турли сабабларга кўра молиявий қийин аҳволга тушиб қолган 9 нафар ўзбекистонлик (3 нафари ёш бола) Владивосток—Бухоро йўналиши бўйича ташкиллаштирилган чартер авиарейси орқали бепул Ўзбекистонга қайтарилди.
Таъкидланишича, мазкур хайрли иш Россиянинг Владивосток шаҳрида фаолият юритиб келаётган «Восток—Бухара» масъулияти чекланган жамияти раҳбари, ўзбекистонлик А.Азизов ҳамда Ўзбекистоннинг Владивосток шаҳридаги Бош консулхонаси ҳамкорлигида амалга оширилган.
Аввалроқ Рубцовск шаҳрида пулсиз кўчада қолган олти нафар Ўзбекистон фуқароси Новосибирск шаҳрига олиб келингани тўғрисида хабар берилганди.
Мавзуга доир:
Изоҳ (0)