БМТ Иқтисодий ва ижтимоий кенгашининг (ИИК) 20 апрелдаги мажлисида Туркманистон 2022—2024 йиллар учун гендер тенглиги ва аёлларнинг имкониятларини кенгайтириш масалалари («БМТ-Аёллар») бўйича БМТ тузилмасининг Ижроия кенгаши аъзолигига сайланди. Бу ҳақда Туркманистон Ташқи ишлар вазирлигига таяниб «Хроника Туркменистана» хабар берди.
«Ушбу қарор Туркманистон ҳукуматининг аёлларни мамлакатнинг ижтимоий-сиёсий, иқтисодий, жамият ва маданий ҳаётига жалб қилиш борасидаги саъй-ҳаракатларига мос келади. Хотин-қизларнинг жамиятдаги даражасини ошириш соҳасидаги муҳим миллий ҳужжатлардан бири ‘2021—2025 йилларда Туркманистонда гендер тенглиги бўйича миллий ҳаракатлар режаси’ (2020 йилнинг декабрь ойида имзоланган) ҳисобланади», — дейилади хабарда.
«БМТ-Аёллар» 2010 йилда БМТ муассасалари фаолиятининг самарадорлигини ошириш мақсадида ташкил этилган бўлиб, ташкилот Бош ассамблеясининг ёрдамчи органи ҳисобланади ҳамда гендер тенглиги ва аёлларнинг ҳуқуқларини кенгайтириш бўйича фаолият юритади. Тузилма БМТнинг гендер тенглигини таъминлаш бўйича ишларини мувофиқлаштирувчи орган сифатида иш олиб боради.
2018 йилда Инсон ҳуқуқлари бўйича туркман ташаббуси (ИҲТТ) БМТнинг Хотин-қизларга нисбатан тенгсизликка барҳам бериш қўмитаси учун муқобил баёнот тайёрлаган эди. Аёлларга тамаки маҳсулотлари сотишни тақиқлаш, ҳайдовчилик гувоҳномаси беришни ва унинг муддатини узайтиришни бекор қилиш, аёллар кийиши ва ишлатиши мумкин бўлган кийим ва косметика воситаларининг танловини чеклаш очиқ-ойдин тенгсизликнинг мисоллари сифатида келтирилган.
Ушбу ҳисобот асосида БМТ қўмитаси 2018 йилнинг июль ойидаги Туркманистоннинг расмий ҳисоботини тинглаш пайтида кўтарилган бир қатор тавсиялар ва саволларни тайёрлаган эди.
Маълумот учун, БМТ Хавфсизлик кенгашининг норасмий йиғилишида БМТ бош котибининг сиёсий масалалар бўйича ўринбосари Розамарий ДиКарло давлат бошқарувидаги эркаклар ва аёллар улуши 130 йил ичида тенглашиши мумкинлигини айтган эди.
Германия ҳукумати таркибига кирувчи партиялар немис компанияларининг бошқарув раёсатида аёллар учун мажбурий квоталар жорий қилишга келишиб олди. Канцлер Ангела Меркель бошчилигидаги Христиан-демократик иттифоқ / Христиан социал иттифоқи ҳукумрон партиялар уч ва ундан ортиқ кишидан иборат компания раҳбарияти таркибида камида бир нафар аёл бўлиши кераклиги тўғрисида состиал-демократлар билан келишувга эришди.
Мавзуга доир:
Изоҳ (0)