“Shaharning darvozasi joyida turibdimi o‘zi?” — Komil Allamjonov O‘zbekistonga kelgan “kurdistonlik tabib” atrofida bo‘layotgan voqealarga munosabat bildirdi
Kurdistondan chiqqan hamda dunyo bo‘ylab kezib yurgani aytilgan tabib Ali Mahmud Hasan Kurdistoniy O‘zbekistonga kelgani va Sog‘liqni saqlash vazirligi fuqarolarni soxta tabiblardan ehtiyot bo‘lishga chaqirgani to‘g‘risida xabar berilgandi. Keyinroq Ichki ishlar vazirligi ham aholini “assosiz ma’lumotlardan” ogohlantirgan. Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov ham Toshkentga kelgan tabibga o‘z munosabatini bildirgan.
O‘zbekistonga kelgan “kurdistonlik tabib” Ali Mahmud Hasan bo‘yicha IIV va Sog‘liqni saqlash vazirligi fuqarolarni ogohlantirdi.IIV mish-mishlardan kelib chiqqan asossiz ma’lumotlarga ishonmaslikni aytgan bo‘lsa, Sog‘liqni saqlash vazirligi aholining ishonch va e’tiqodidan foydalanib, soxta tabiblik faoliyati bilan shug‘ullanayotganlar haqida ogohlantirdi.
Agar uning firibgarligi haqidagi ma’lumotlar asosli, isbotlangan bo‘lsa, nega uning faoliyati cheklanmayapti? Uning bemalol viloyatma-viloyat yurib, odamlarni davolashiga yo‘l qo‘yib berilyapti.
Agar haqiqatda foydali tabib bo‘lsa, uni ham ro‘yxatga olish, litsenziya degan qoidalari bor. Gap odamlar ishonchi va hayoti haqida ketyapti.
Endi bir kamiga chetdan kelib, xohlagan odam, xohlagan ishini qilib ketishi qolgandi. Shaharning darvozasi joyida turibdimi o‘zi? Albatta, kimdir o‘lishi yoki aziyat chekib, voydod, deyishini kutyapmizmi?
Sog‘liqni saqlash vazirligi, Sanitariya-epidemiologik xizmat karantin, deb rosa jazolashni biladiku. Yoki matbuot xodimlarining ozgina xatosini ko‘rib qolsa, qonunlar va jazolarni eslatuvchi IIV qayerga qarayapti? Bu holatda rasmiy munosabatning o‘zi kamlik qiladi. Ishlash kerak, o‘rtoqlar, quruq gapiravermay!
PS: Shifo izlab har bir imkoniyatdan foydalanmoqchi bo‘lgan barcha bemorlarimizga esa Alloh shifo bersin.
Komil Allamjonov, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi
