Болалар омбдусмани Қашқадарёда жойлашган 5-меҳрибонлик уйидаги шароитларни танқид қилгани ҳақида хабар берилган эди. Бош прокуратура матбуот хизмати етарли шароитлар яратилмаган ушбу меҳрибонлик уйи директори ишдан олиниб, бир қатор масъуллар жавобгарликка тортилганини маълум қилди.
Эслатиб ўтамиз, Китоб туманида жойлашган 5-Меҳрибонлик уйида 12—15 апрель кунлари Олий Мажлиснинг Инсон ҳуқуқлари бўйича вакили (омбудсман) ўринбосари ва туман прокуратураси билан ҳамкорликда ўтказилган ўрганишда муассаса тарбияланувчилари учун етарли шароитлар яратилмаганлиги, муассаса жиҳозлари эскириб қолганлиги, тарбияланувчиларни соғлом овқатлантириш нормаларига амал қилинмаётганлиги ҳамда озиқ-овқат омборхонаси санитария талабларига жавоб бермаслиги аниқланганди.
Бош прокуратура хабарида айтилишича, Китоб тумани прокуратураси томонидан муассасада ўтказилган текшириш натижасига кўра, ўз хизмат вазифаларини лозим даражада бажармаган муассаса директори ҳамда омбор мудири эгаллаб турган лавозимларидан озод қилинди, директор ўринбосари интизомий жавобгарликка тортилди, хўжалик мудири ва парҳез ҳамширасига нисбатан Маъмурий жавобгарлик тўғрисидаги кодекснинг 53-моддаси (санитария қонун ҳужжатларини бузиш) билан маъмурий жавобгарлик тўғрисида иш қўзғатилди.
Изоҳ (0)