COVID-19 пандемияси яқин келажакда назоратга олинади деб ишониш учун барча асослар мавжуд. Бу ҳақда Жаҳон соғлиқни сақлаш ташкилоти (ЖССТ) раҳбари Тедрос Гебрейесуснинг сўзларига таяниб, «РБК» хабар берди.
«Пандемияни бир неча ой ичида назорат остига олиш учун барча зарур воситаларга эгамиз, агар уларни изчил ва мутаносиб равишда қўлласак, бунга эришамиз», — деди ЖССТ раҳбари.
Шу билан бирга, ЖССТ раҳбари бутун дунё бўйлаб 25 ёшдан 59 ёшгача бўлганлар орасида COVID-19 тарқалиши тезлигининг юқори эканидан хавотир билдирди. «Эҳтимол, бу улар орасида вирус тарқалиши осон ва мазкур ёшдагилар ўртасида ижтимоий аралашувнинг юқорилиги натижасида бўлиши мумкин», — деб таъкидлади Гебрейесус.
Унинг сўзларига кўра, бутун дунёда COVID-19 инфекциясининг янги ҳолатлари сони саккизинчи ҳафта кетма-кет ўсиб бормоқда. ЖССТ раҳбарининг таъкидлашича, ўтган ҳафта ушбу кўрсаткич бўйича рекорд даража қайд этилган — 5,2 миллиондан ортиқ.
ЖССТнинг Россиядаги вакили Мелита Вуйнович 18 апрель куни коронавирусдан касалланиш ва ўлим даражаси ошгани сабабли ташкилот пандемия билан боғлиқ вазиятни хавотирли деб баҳолагани ҳақида айтганди.
«Ҳозир биз кетма-кет етти ҳафта давомида касалликка чалиниш ҳолатининг ортиши ва тўрт ҳафта ичида ўлимлар сонининг кўпайишига гувоҳ бўлмоқдамиз. Бу қўрқинчли тенденциялар, чунки вируснинг янги вариантлари пайдо бўлиши чеклов чораларининг бекор қилиниши ва вакциналарнинг мамлакатлар ўртасида адолатсиз тақсимланишига ўз таъсирини ўтказмоқда», — деди ЖССТ вакили.
Февраль ойида ЖССТ коронавирус пандемияси 2022 йил бошида тугаши мумкинлигини айтганди. Шунингдек, Bloomberg коронавирус пандемияси қачон тугашини ҳисоблаб чиққан. Ҳисоб-китоблар учун вакциналар ҳажми асос қилиб олинди, чунки илмий жамоатчилик фикрига кўра, пандемияни енгиш учун дунё аҳолисининг 70—85 фоизи эмланиши керак. Ҳисоб-китоблар ўзгариши мумкин, чунки айрим мамлакатлар вирусни тезроқ енгади, дейди таҳлилчилар.
Жонс Ҳопкинс университети маълумотларига кўра, пандемия бошидан бери бутун дунёда 142 098 067 киши коронавирусга чалинган, шулардан 3 029 811 нафари касаллик оқибатида вафот этган.
Изоҳ (0)