АҚШнинг ўнлаб қирувчи самолётлари Польшага кириб келди, Пентагон буни «одатий ҳарбий машғулотлар» билан изоҳлади

Польша Мудофаа вазирлиги республикага «АҚШнинг бир неча ўнлаб самолётлари» етиб келганини маълум қилди, бунда гап F15 ва F16 қирувчилари ҳақида бормоқда.

Пентагон бош котиби Жон Кирби брифингда маълум қилишича, Америка қирувчи самолётларининг Польшага ташланиши ҳарбий машғулотлар билан боғлиқдир.

У республикага қирувчиларнинг юборилиши ҳамда Россия ва Украина чегарасидаги вазият ўртасидаги боғлиқликни инкор қилди.

«Бу Украина билан чегарадаги ёки Қримдаги воқеаларга нисбатан жавоб чоралари эмас. Бу одатий манёврлар. Биз буни мунтазам амалга ошириб турамиз», — деди Кирби ва бундай ўқув машғулотлари АҚШнинг Европадаги айланма иштирокининг бир қисми эканини қўшиб қўйди.

Евроиттифоқ ва АҚШ Украина билан чегара яқинида Россия қўшинларининг тўплангани ҳақидаги хабарлар юзасидан бир неча марта хавотир билдирган, Ғарб Россияни қўшинларини олиб кетишга чақирган эди.

Март ойи охирида The New York Times газетаси 4 минг рус қўшини Украина чегараларига, хусусан, Ростов, Брянск, Воронеж вилоятлари ва Қримга юборилгани ҳақида хабар берди. Ҳаммаси бўлиб, Россия Қуролли Кучларининг 28 та тактик баталён гуруҳи чегаралар бўйлаб жойлаштирилган. Conflict Intelligence Team суриштирув гуруҳи Россия қўшинларининг Россия—Украина чегараси ҳудудида тўпланишини 2014—2015 йиллардан бери энг кескин кўрсаткич деб атади.  Киев ўз чегаралари яқинида рус қўшинлари тўпланганини тасдиқлади ва уни «ўз кучини кўз-кўз қилиш» деб атади. АҚШ Россиядан мазкур «провокациялар»га изоҳ беришни талаб қилди, шунингдек, АҚШ президенти Жо Байден лавозимига келганидан бери биринчи марта Украина раҳбари Владимир Зеленскийга қўнғироқ қилди. Кремлнинг таъкидлашича, Россия ўз ҳудудида ўз қўшинларини ҳаракатга келтирмоқда ва «бу ҳеч кимни безовта қилмаслиги керак, қўшин ҳеч кимга таҳдид солмайди».