Буюк Британия май ойида, Украина ва НАТО бўйича шериклари билан бирдамлик ва уларни қўллаб-қувватлаш рамзи сифатида, минтақада Россия қўшинларининг кўпайтирилиши фонида Қора денгизга иккита ҳарбий кема юборишни режалаштирмоқда. Бу ҳақда The Sunday Times нашри хабар берди.
Нашрнинг маълумотларига кўра, эскадра мина ташувчиси ва фрегат (ҳарбий кема) Ўрта Ер денгиздаги Қироллик Ҳарбий денгиз кучлари зарбдор гуруҳидан ажралиб чиқиб, Босфор бўғози орқали Қора денгизга йўл олади. Бортида Россия кемаларидан таҳдид бўлган тақдирда, ёрдамга келувчи F-35 қирувчи самолётлари ва Мерлин вертолётлари жойлашган ҲМС Queen Элизабетҳ самолёт ташувчи кемаси уларни кузатиб боради.
Аввалроқ АҚШ ҳам ўзининг ҳарбий кемаларини Қора денгизга юбориш масаласини кўриб чиқди, лекин минтақада қўшимча босимни юзага келтирмаслик учун бу фикрдан қайтди.
«Мамлакатлар сиёсати» Telegram-каналида ёзилишича, бу Жо Байден ва Владимир Путин ўртасида 13 апрель куни бўлиб ўтган телефон орқали суҳбатдан кейин ўзгаришлар бошлангани ҳамда уруш хавфининг аста-секин узоқлашаётганидан далолат берувчи илк қадам.
2021 йил март ойининг охирида расмий Киев ва тан олинмаган Донецк ҳамда Луганск Халқ Республикалари ўртасидаги зиддият авж олди. Бунинг фонида Россия ўзиннинг Украина чегараларидаги қўшинлари сонини кўпайтира бошлади. Conflict Intelligence Team (CИТ) тергов гуруҳи Украина чегараларидаги Россия қўшинларининг фаол тарзда кўпайтирилиши 2014–2015 йиллардан буён энг юқори даражага чиққанини айтди. Киев маълумотларига кўра, Москва Украина чегарасига ва Қримга 40 минг нафардан аскарни жойлаштирган.
Аввалроқ Франция президенти Эммануэль Макрон, Германия канцлери Ангела Меркель ва Украина президенти Владимир Зеленский Донбассдаги можаронинг авж олишига йўл қўймаслик учун Россия ўз қўшинларини Украина билан чегарадан олиб кетиши кераклигини айтганди.
Бунгача ҳам Байден ва Меркель Россияни Украина билан чегарадаги қўшинларини олиб кетишга чақирган эди. Унгача Россия Украина чегарасига ва Қримга 40 минг нафардан аскар жўнатгани ҳақида хабар берилган. Украина президенти Владимир Зеленский Россияни «жиловлаш»да Байдендан ёрдам сўраган. Кремль эса Россия ва Украина ўртасидаги уруш эҳтимолини истисно қилган.
Изоҳ (0)