Россия ташқи ишлар вазирлиги АҚШнинг мамлакатга қарши қўллаган янги санкцияларига нисбатан жавоб ҳаракатлари амалга оширилганини хабар қилди.
Вазирлик сайтидаги хабарда Россиядан 10 нафар америкалик дипломат ортга қайтарилиши, мамлакат ҳудудига АҚШдан қисқа муддатли сафарларга бир йил давомида 10 нафардан кўп америкалик дипломатларнинг келиши тақиқлангани, АҚШ дипломатик миссияларига Россия ва/ёки учинчи бошқа бир мамлакат фуқаролари орасидан маъмурий-техник ходимларни танлаб олиши ва ишга ёллаши тақиқлангани, 1992 йилда «Муносабатларда очиқлик ва ошкоралик англашуви» меморандумининг амал қилишини тўхтатиш, Россиядаги АҚШ Давлат департаменти ва бошқа давлат тузилмаларига тааллуқли фондлар ва нодавлат ташкилотларнинг фаолиятини тўхтатиш масалалари қайд этилган.
Шунингдек, Россия ТИВ Вашингтон ҳамда Москва элчилари вазиятни таҳлил қилиш ва маслаҳатлашув ўтказиш учун ўз мамлакатлари пойтахтида бўлиши лозим деб ҳисобламоқда. Вазирлик саккиз нафар айни вақтда лавозимида фаолият олиб бораётган, собиқ амалдор ҳамда арбобларнинг Россия ҳудудига киришини тақиқлади. Улар Россияга қарши сиёсатда бевосита иштирок этгани учун санкциялар рўйхатига киритилган.
Жумладан, ФҚБ директори Кристофер Рей, АҚШ миллий разведкаси директори Эврил Хейнс, мамлакат бош прокурори Меррик Гарланд, Федерал қамоқхоналар бюроси директори Майкл Карваҳал, ички хавфсизлик вазири Алехандро Майоркас, президентнинг ички сиёсат бўйича маслаҳатчиси, АҚШнинг БМТ масалалари бўйича собиқ раиси Сюзан Райс, Трамп президентлиги даврида унинг миллий хавфсизлик масалалари бўйича ёрдамчиси, АҚШнинг БМТдаги доимий вакили лавозимида ишлаган Жон Болтон ва Марказий разведка собиқ директори Роберт Вулсига Россия ҳудудига кириш тақиқлаб қўйилган.
Вазирлик уч нафар россиялик дипломатнинг Польшадан қайтариб юборилишига жавобан беш нафар польшалик дипломат мамлакат ҳудудидан чиқариб юборилишини билдирган.
Россия ТИВ АҚШни қилмишларининг оқибати ҳақида мулоҳаза юритишга ва конронтацион йўналишдаги алоқалардан тийилишга чақирган, акс ҳолда Россия ҳукумати мамлакатдаги дипломатик миссиялар ходимларининг сонини 300 кишигача камайтиришини қайд этган. Шунингдек, баёнотда дипломатларда ҳам америкаликларни иқтисодий томондан қийнаб қўя оладиган куч борлиги таъкидланган.
«Ҳаммаси бизнинг танлов. АҚШ билан муносабатлар кескинлашувини истамаган эдик. АҚШ билан икки томонлама муносабатларни меъёрлаштириш учун хотиржам ва профессионал мулоқотга тайёрмиз», – дейилган Россия ташқи ишлар вазирлигининг баёнотида.
Аввал АҚШ Россияга қарши янги санкциялар жорий қилган, мамлакат президенти Жо Байден ушбу ҳаракатни изоҳлаб, Россия АҚШ демократияси йўлида ғов бўлаверса, бундан кейинги чораларни кўришга ҳам тайёрлигини айтганди. Хитой ТИВ АҚШнинг Россияга қарши санкцияларини «бир томонлама» деб атаб, уларни қоралаган.
Изоҳ (0)