Франция Дори воситалари хавфсизлиги бўйича миллий агентлиги (АНСМ) коронавирусга қарши AstraZeneca вакцинаси билан эмлангандан сўнг тромбоз ҳолати юзага келиши туфайли саккиз киши вафот этгани ҳақида хабар берди, деб ёзади «Коммерсантъ».
АНСМ веб-сайтидаги маълумотларда кўрсатилишича, мамлакатда 8 апрель ҳолатига кўра, 2,72 миллиондан ортиқ AstraZeneca вакцинаси қабул қилинган. Францияда AstraZeneca препарати билан коронавирусга қарши эмлаш кампанияси бошланганидан буён мамлакатда 23 та тромбоз ҳолати қайд этилган, улардан 8 таси ўлимга олиб келган. Биргина 3 апрель куни қонда тромб ҳосил бўлиши бўйича 12 та ҳолат (4 таси ўлим билан тугаган) қайд этилди.
Эслатиб ўтамиз, 6 апрель куни Европа дори-дармон агентлиги (EMA) вакили коронавирусга қарши AstraZeneca вакцинаси билан эмлаш ва қонда тромб келиб чиқиши ўртасидаги боғлиқликни тасдиқлади. Агентлик қон тромбларини AstraZeneca вакцинасининг «жуда кам учрайдиган» ножўя таъсири деб тан олди, аммо вакцинадан фойдаланишни давом эттиришга чақирди.
ЖССТ ҳам AstraZeneca вакцинаси билан эмлаш ва тромб ҳолатлари ўртасидаги боғлиқликни тасдиқлади. Бироқ ташкилот AstraZeneca вакцинасининг самарадорлиги унинг зарарли томонларидан устун деб ҳисобламоқда.
Жанубий Кореяда AstraZeneca вакцинаси билан 60 ёшгача бўлганларни эмлаш тўхтатилди. 14 апрелда Дания AstraZeneca вакцинасидан фойдаланишни бутунлай бекор қилган биринчи мамлакат бўлди.
17 март куни Тошкентга AstraZeneca вакцинасининг 660 минг дозаси олиб келинди. Ўзбекистонда аҳолини коронавирусга қарши эмлаш тадбирлари 1 апрелдан вилоятлар марказлари ва катта шаҳарлардан бошланди. Аҳоли AstraZeneca ва Ўзбекистон—Хитой ҳамкорлигида ишлаб чиқилган ZF-UZ-VAC2001 вакцинаси билан эмланмоқда.
Изоҳ (0)