Покистон Ички ишлар вазирлиги мамлакат телекоммуникация бошқармасига ижтимоий тармоқлар ва мессенжерлар — Twitter, Facebook, WhatsApp, YouTube ва Telegram’ни вақтинча блокировка қилишни буюрди. Бу ҳақда Dawn нашрига таяниб «Коммерсантъ» хабар берди.
Хабарга кўра, блокировка 16 апрель, жума куни маҳаллий вақт билан соат 11:00 дан 15:00 гача (Тошкент вақти билан бир хил) амал қилган. Блокланиш сабаби расмий равишда маълум қилинмаган, нашр буни норозилик намойишлари билан боғламоқда.
Покистон телекоммуникация бошқармаси «жамоат тартиби ва хавфсизлигини таъминлаш учун» баъзи ижтимоий тармоқларга киришни чеклаш кераклигини айтмоқда. Nayatel интернет провайдер хизмати мижозларга платформаларни Ички ишлар вазирлигининг кўрсатмаларига биноан тўсиб қўйганини айтди.
Dawn нашри блокировкани Покистондаги «Техрик-и-Лаббайк» ўта ўнгчи исломий ҳаракатнинг тақиқланишидан кейинги воқеалар билан боғлиқ деб ҳисобламоқда. Ҳаракат террористик ташкилот деб тан олинган ва фаолиятига тақиқ қўйилган эди. Ташкилот раҳбари Саад Ҳусайн Ризви ҳибсга олинган. Кўчаларда ҳаракат тарафдорларининг норозиликлари бошланиб, оқибатда етти киши ҳалок бўлган, 300 дан ортиқ полиция ходими жароҳат олган.
Аввалроқ Покистон суд қароридан кейин TikTok ижтимоий тармоғини блоклаши ҳақида хабар берилган эди. Пешавор шаҳри юқори судининг таъкидлашича, суд тармоқнинг ахлоқсиз контент тарқатаётгани ҳақидаги аризачининг далиллари билан танишиб, дастурни блоклаш тўғрисида буйруқ берган. TikTok’нинг Покистондаги вакилининг айтишича, у суд қарори ҳақида эшитган ва компания кейинроқ бу масала юзасидан изоҳ беради.
Изоҳ (0)