Шавкат Мирзиёев 13 апрель куни «Бюджет жараёнида фуқароларнинг фаол иштирокини таъминлаш бўйича қўшимча чора-тадбирлар тўғрисида»ги қарорни имзолади. «Gazeta.uz»нинг ёзишича, қарор Молия вазирлиги томонидан Россия Молия вазирлиги ҳузуридаги Илмий тадқиқотлар молия институти (НИФИ) ва бошқа ташкилотларнинг экспертлари кўмагида ишлаб чиқилган.
Унга кўра, Ўзбекистонда 2021 йил май ойидан 14 та туман (шаҳар)да бюджет харажатларининг 5 фоизи жамоатчилик фикри асосида шакллантирилган тадбирларни молиялаштиришга йўналтирилади. 2022 йил 1 январдан эса янги тартиб республиканинг барча туман (шаҳар)ларида босқичма-босқич жорий этилади.
Ушбу мақсадларда 2021 йилда истисно тариқасида туман (шаҳар)лар бюджетларига республика бюджетидан қўшимча равишда 92,7 миллиард сўм маблағ ажратилади. 2022 йилдан бошлаб эса мазкур маблағлар тегишли туман (шаҳар)лар бюджети параметрларида ажратилиши кўзда тутилган.
Бундан ташқари, 1 июлдан жамоатчилик фикри асосида шакллантирилган тадбирларни молиялаштиришга ажратиладиган туман (шаҳар)лар бюджетлари қўшимча маблағларининг энг кам миқдори 10 фоиздан 30 фоизга оширилади.
Молия вазирлигининг маълум қилишича, жамоатчилик фикри асосида шаклланган тадбирларни молиялаштиришга йўналтирилиш жараёни ҳар йили 2 маротаба (1 февраль ва 15 июлга қадар) ўтказилади.
Маблағлар тегишинча туман ва шаҳар ҳокимлиги қошида очиладиган «Фуқаролар ташаббуси жамғармаси» шахсий ғазна ҳисобварағида жамланади.
«Фуқаролар ташаббуси жамғармаси» шахсий ғазна ҳисобварағидаги маблағларнинг бошқа мақсадларга сарфланиши қатъиян тақиқланади.
Туман (шаҳар) ҳокимликлари молиялаштириш тўғрисидаги маълумотларни ҳар чорак якунидан кейинги ойнинг 25-санасига қадар ўзининг расмий веб-сайти ва «Очиқ бюджет» порталига жойлаштириб бориши лозим.
Изоҳ (0)