Ўзбекистонда коронавирусга қарши эмланганларга онлайн-маълумотномаларни бериш бошланди
Ўзбекситонда коронавирусга қарши эмланганларга онлайн-маълумотномаларни бериш бошланди. Бу ҳақда Ягона интерактив давлат хизматлари портали матбуот хизмати хабар берди.
Эндиликда вакцинация жараёнидан ўтган фуқаролар «My.gov.uz» портали орқали ҳам эмланганлик тўғрисида маълумотнома олишлари мумкин. Ушбу хизматдан фойдаланиш учун ЯИДХПда рўйхатдан ўтишнинг ўзи кифоя.
Ягона порталда «COVID-19’га вакцинациялаш ҳолатини текшириш» давлат хизматига ўтилади ва текшириш тугмаси босилади.
Таъкидланишича, яқин кунларда мазкур йўналишда янги хизматлар тақдим этилади.
Аввалроқ Ўзбекистонда тўлиқ эмлаш курсини тамомлаган фуқароларга QR-кодли сертификат берилиши маълум қилинганди.
Эслатиб ўтамиз, аҳолини коронавирусга қарши эмлаш тадбирлари 1 апрелдан бошланди. Ўзбекистонда бугунги кунда 1 миллион 660 минг доза вакцина бор. Уларнинг 660 минг дозаси COVAX жамғармаси томонидан олиб келинган AstraZeneca вакцинаси, 1 миллион дозаси Ўзбекистон–Хитой ҳамкорлигида ишлаб чиқилган ZF-UZ-VAC 2001 вакцинаси.Аҳолини ушбу вакциналар билан эмлаш бир пайтнинг ўзида амалга оширилади. Бунда эмланувчи биринчи эмланишни қайси вакцина билан бошласа, иккинчисини ҳам айнан ўша вакцина билан якунлайди. AstraZeneca вакцинаси билан 2 маротаба, ZF-UZ-VAC 2001 вакцинаси билан 3 маротаба эмлаш кўзда тутилмоқда. Яъни вакцинация икки хил вакцинада икки хил амалга оширилади. Шунингдек, Ўзбекистонда хусусий клиникаларга COVID-19’га қарши пулли эмлаш ўтказишга рухсат берилади.
