Президент Шавкат Мирзиёев раислигида 8 апрель куни тадбиркорликни ривожлантириш ва 2021 йилда аҳоли бандлигини таъминлаш дастури ижросига бағишланган видеоселектор йиғилиши бўлиб ўтди. Давлат раҳбари йиғилишда Қашқадарё ва Навоий вилоятлари ҳокимларининг биринчи ўринбосарларини лавозимидан озод этди.
Президент вилоят, шаҳар ва туман раҳбарлари жойларда кичик бизнес вакиллари билан умуман мулоқот қилмаётганини танқид қилган. «Инфратузилма йўқ, газ, электр энергияси ва айланма маблағ йўқ», — дейди давлат раҳбари.
Қашқадарё вилояти ҳокимининг биринчи ўринбосари Бўтаев, Солиқ бошқармаси бошлиғи Бозоров, вилоят Марказий банки раҳбари Ражабов, Навоий вилояти ҳокимининг биринчи ўринбосари Ҳасанов, вилоят Марказий банки раҳбари Саидов ва Солиқ бошқармаси бошлиғининг биринчи ўринбосари Муҳаммадиев лавозимидан озод этилсин.Улар бирор ерда ишламасин. Улар шунча ойлик бериб, шунча ҳаракат қилганимизни, сиёсатга хиёнат қилганини билиши керак.
Шу билан бирга, Улуғнор, Узун, Ёзёвон, Деҳқонобод туманлари ҳокимининг биринчи ўринбосарлари, Андижон, Олтинкўл, Олот, Қоракўл, Оқолтин, Чилонзор, Мўйноқ туманлари, Хива ва Чирчиқ шаҳридаги солиқ идоралари бошлиқлари ҳам лавозимидан бўшатилади.
Ишдан олинганлар ишлаган даври учун ҳамма ойлигини давлатга топширсин. Телевизорда расмини чиқариб, «хиёнатчи» деб бериш керак. Халқ буларнинг кимлигини, сиёсатга қарши эканини билиши керак.
Шавкат Мирзиёев, Ўзбекистон Президенти
Аввалроқ Қашқадарё вилояти ҳокими Зоир Мирзаев, вилоят прокурори Тожиев, ички ишлар бошлиғи Сотволдиевга ҳамда Навоий вилояти ҳокими Қобил Турсунов ва вилоят прокурори Аҳмедовга ҳайфсан берилган эди. Йиғилишда Президент Марказий банк, унинг ҳудудий бошқармалари ва тижорат банклари фаолияти ҳам талаб даражасида эмаслигини таъкидлаб ўтган.
Изоҳ (0)