Prezident Shavkat Mirziyoyev raisligida 8-aprel kuni tadbirkorlikni rivojlantirish va 2021-yilda aholi bandligini ta’minlash dasturi ijrosiga bag‘ishlangan videoselektor yig‘ilishi bo‘lib o‘tdi.

Yig‘ilish tanqidiy-tahliliy ruhda boshlandi. Prezident viloyat rahbarlari, ayniqsa, tuman hokimlari tadbirkorlikni rivojlantirishdagi kamchiliklarga yo‘l qo‘yayotgani, agar uch oy ichida sektor rahbarlari xulosa qilmasa, ishdan olinishi haqida ogohlantirdi, deya xabar bermoqda “Daryo” muxbiri.

“Hamma hudud va sektor rahbarlari bir haqiqatni tushunib olishlari shart. Yangi ish o‘rinlari yaratish, aholi daromadi va xarid qobiliyatini oshirish uchun hududiy va yalpi ichki mahsulot barqaror o‘sishini ta’minlash, barchamizning eng ustuvor vazifamizdir. Bu ishlarni, albatta, tadbirkorlar amalga oshiradi”, – dedi Prezident Shavkat Mirziyoyev.

Davlat rahbari sektor rahbarlari dunyoqarashini o‘zgartirib, tadbirkor bilan do‘st bo‘lib, yangicha ishlamasa, natija va samara bo‘lmasligini alohida ta’kidlab o‘tdi.

“Barcha hudud rahbarlariga tadbirkorlik bo‘yicha ahvoli qandayligi, iqtisodiy natijalari haqidagi tahlil va hisob-kitoblar yetkazilib, tushuntirildi. Qaysi rahbar qanday ishlaganini o‘zi ko‘rib, xulosa qilishi kerak”, – dedi davlat rahbari.

Bundan avval Shavkat Mirziyoyev Janubiy Koreya parlamentining Milliy Assambleya spikeri boshchiligidagi delegatsiyasini, Rossiya sanoat va savdo vaziri Denis Manturov boshchiligidagi delegatsiyani hamda Eron tashqi ishlar vaziri Muhammad Javod Zarifni qabul qilgani haqida xabar berilgandi.