Ўзбекистоннинг 726 та маҳалласида аёллар, болалар ва уй хўжаликларининг ижтимоий-иқтисодий фаровонлиги тўғрисида муҳим маълумотларни йиғиш бошланди. Бу ҳақда «Gazeta.uz» маълум қилди.
ЮНИСЕФнинг Тошкентдаги ваколатхонасининг маълум қилишича, ушбу тадқиқот уй хўжаликлари билан сўровнома ўтказишга асосланган Мултииндикатор кластер кузатувлари бўлиб, MICS деб аталади. Маълумотларни йиғиш 5 апрелдан бошланган бўлиб, 31 июлгача давом этади. Ҳукумат ва MICS доирасида ҳамкорлик қилаётган ташкилотлар аҳолини «маълумотларни йиғаётган тадқиқотчилар учун ўз уйларининг эшикларини очишга» чақирган.
Тўпланган маълумотлар ва кўрсаткичлар ижтимоий хизматлар соҳасида қарорлар қабул қилиш, миллий сиёсатни, ривожланиш ва хизмат кўрсатиш дастурларини ишлаб чиқиш ва амалга ошириш учун зарур. У, шунингдек, Ўзбекистоннинг барқарор ривожланиш мақсадларига эришиш йўлидаги тараққиётини кузатиш учун муҳим бўлиб, халқаро маълумотлар базаларига киритилади.
Сўнгги йигирма йил ичида 100 дан ортиқ мамлакатда 300 дан ортиқ MICS тадқиқотлари ўтказилган. Улар болалар ва аёллар фаровонлигининг асосий кўрсаткичлари тўғрисидаги маълумотларни тақдим этиш ва уларнинг ҳаётини яхшилашга қаратилган сиёсатни шакллантиришга ёрдам берган.
MICS Давлат статистика қўмитаси ва ЮНИСЕФ томонидан амалга оширилмоқда. MICS бундан аввал Ўзбекистонда 2006 йилда ўтказилган.
Изоҳ (0)